نصيحة من الدكاترة لطلبة الثانوية العامة : بلاش أحسن !

طلاب كلية الطب زهقانين ومنهم نادمين علي دخولهم الكلية .. بل وحددوا لنا 7 أسباب "كنصيحة" لازم أي طالب ثانوي متفوق يعرفها قبل ما يدخل كلية الطب ، وهي أيضا 7 أسباب جعلتهم نادمين علي دخولهم للكلية .
وأتفق علي هذه الأسباب يحيي رأفت الطالب بالفرقة الخامسة بكلية طب عين شمس , والطلاب وندي يحيي, مصطفي العيسوي, محمد طاهر , محمد عبد الحميد وإيثار بدوي بالفرقة الرابعة .. وقالوا :
1- الاستخسار ..يعني أوعي تستخسر أن مجموعك كبير وتكون عايز تدخل طب لمجرد أنك حصلت علي مجموع عالي ، لازم تكون عاشق تراب الكلية وتحلم بها من زمان عشان ماتتصدمش لما تدخلها.
2- أوعي تكون فاكر أن الدكتور " برستيج " لأن لما تتخرج ها تعرف إن هاتاخد 240 جنيها بس وبدل عدوي 3 جنيهات وعشان تبدأ تكون نفسك وتقف عند مرحلة الصفر يبقي لما توصل ل30 سنة علي الأقل لو أنت ولد .. ولو بنت ممكن عند سن ال28 , بس لو أتجوزت هتاخد بدل جواز 7 جنيهات !.
3- الوهم الكبير...وهو أنك لما تتخرج تفتكر انك أتخصصت في قسم معين لأن عشان تتخصص يبقي لازم تعمل ماجستير أو تكون مجرد مارس عام!!.
4- الصبر..دي اهم صفة لازم تكون عند أي طالب يفكر يدخل كلية الطب لأنهم في الكلية هيختبروا صبرك طول فترة الدراسة لأنها أحيانا تمتد في بعض الفرق إلي 12 شهرأً متواصلاً بالإضافة إلي شهرين امتحانات !!, وكمان لازم يكون عندك قوة تحمل لأنك لما تقابل صاحبك اللي كان معاك في ثانوي وتلاقيه تخرج من أسنان ولا من هندسة واشتعل وخطب وقرب يتجوز وأنت يادوب لسه متخرج وقدامك لسه جيش وفترة إنابة وقبلهم سنة امتياز.
5- لازم تكون غنياً... لسببين, أولا عشان تاخد دروس في الكلية لأن اقل حاجه درسين في التيرم والدرس الواحد اللي هو 12 حصة تتكلف من 1700 وتصل إلي 2800 في بعض المواد زي الباطنة لأن فيها شغل كتير .. وأحيانا بعض الدكاترة المشاهير يرفعوا ثمن الدرس عشان مش عايزين طلبة كتير ، أما السبب الثاني لأنك بعد ما تتخرج لازم تعمل ماجستير ويفضل من أي دولة أجنبية عشان تحصل علي لقب الزمالة .. وعشان تعمل ده مش هايكون أقل ياي حال عن 30 ألف جنيه.
6- لازم هتقع تحت ابتزاز المرضي في العملي .. لأن العيان أصبح مثقفاً زيادة عن اللزوم وممكن يضللك في الامتحان وتنقص درجات وعشان كده يبقي لازم تكون عامل حسابك أنك " تدفع " للعيان اللي هتكشف عليه وقت الامتحان!!
7- غير مسموح انك تغلط .. رغم أن الخطأ من صفات البشر ولكن المفروض انك ملاك ,وده لأن الخطأ في الطب يساوى حياة إنسان...يعني ممكن في النهاية تلاقي في أيديك كلابشات حديد وبدل ما تفتح عيادة يتفتح لك سجل إجرامي لخطأ أدي إلي وفاة بني آدم.
ياتري بعد الكلام ده .. لسه مصمم أنك تدخل طب ولا غيرت رأيك ؟!...عموماً إحنا ننصحك حتى قبل ما تدخل الكلية ممكن تزورنا في أسرة " فكرة " عشان هاتاخد فكرة .. وأبقى أشترى بكرة ! .