أحلامي مع السيسي

الأماني والأحلام حق مشروع للجميع لا يزاحمك أحد عليها أو يتهمك بالاستيلاء على ما ليس من حقك بل على العكس قد تقربك من أشخاص يثقلون لياليهم بأحلام وأمان لا تختلف عن أمانيك.
ولأنها حق لك فدعنا عزيزي الإنسان أن نحلم ونطير بأحلامنا فى عنان السماء بعد ان انتخبنا الرجل الذى التف حوله الملايين.. تعالوا نرسم أحلاما تنقلنا الى المستقبل السعيد.....
أحلامنا :
هل هي في منزل تملك جدرانه ويكفيك رعب الإيجار وإذلاله ام في قدرتك على توفير المأكل والمشرب لأسرتك وسط ارتفاع الاسعار الجنوني.
أم تراها في استطاعتك حمل طفلك كلما ارتفعت حرارته الى مستشفى قريب منك مجهز بكل ما هو حديث يستقبلك في أي وقت وقلبك مطمئن أن لا خطر او خطأ طبيا قد يحدث ، ام هي في دفئك من برد ونجاتك من غرق او ظلال من لهيب الشمس.
أم تراها في اكتمال طريق غير مكتمل الرصف أو مبنى مزقت جدرانه السنين لكثرة عبورها الموجع عليه أم في رؤية شارع مرصوف وحي نظيف هجرت أسراب البعوض زواياه خالى من القمامة .
أنا بحلم ببيت دافى فيه لمة ودفء الأهل لما انزل منه القى شارعنا نظيف بيبرق فى سله للقمامه كل مترين وفى تلاجه الخير فيها اكل للجعان والمحتاج اشترك فيها عشر بيوت وضعوا فيها ماتبقى من اكلنا واللي كان هيروح للقمامة عشان لو فى عابر سبيل وجعان يفتح التلاجة وياكل اكل نضيف لان المصرى ماياكلش من الزبالة امشى ع رجلى اخرج ع الميدان القى حديقة كلها خضرة ومافيش ورقة ف الشارع لان كل واحد بيحترم نفسه ومابيرميش حاجه الا فى مكانها والقى سيولة مرورية لان كل واحد عارف الصح من الغلط واللي عايز يقف يركن ف مكان مخصص للانتظار ... بقف شويه القى وسيله مواصلات آدمية تنقلنى للمكان ال انا عايزاه بسعر محدد ومعروف بدون طمع ولا زياده . انزل لشغلى ف ميعادى بالى مرتاح ولو عايزه ازود دخلى يكون فى نظام اوفر تيم . اخلص شغلى اروح السوق اشترى احتياجاتى بالسعر المحدد عشان التاجر بيراعى ضميره وخايف ربه ومابيزودش فى التسعيره. ارجع بيتى القى ولادى بيحكولى عن مدرستهم ومدرسينهم ومناهجهم اللي كلها فايده وعلم ويضفولى اللي ماكنتش باخده ف المدرسة وانا فى سنهم ومدرسين بيشرحوا بضمير ومافيش دروس خصوصية و اللي منهم يطلع دكتور واللي عالم واللي دخل تعليم فنى عالى واتعلم حرفه يشارك بيها فى نهضه بلده وزوج مش شايل هم بكره لأن المرتب بيكفى وندخر منه لجواز البنات . بشوف شباب بلدى بيشتغل وبيبتكر وواخد حقه وسعيد ويوم مايقول عايز اتجوز يلاقى قروض حسنه بفوائد بسيطه بتساعده . عايزه قنوات فضائية مفيدة بتقدم مادة راقية والبرامج الترفيهية مافيهاش كلام مبتذل وافلام ومسلسلات بتقدم فن راقى وهادف من غير عرى ولا دعارة عايزة اطبق دينى صح وحريه العباده للجميع بدون تطرف ولا ارهاب عايزه نكون سفراء لدين الاسلام امام العالم باحترمنا لرسول الله وسننه وبتطبيق كتاب الله بدون ماحد يضلل حد باسم الدين ، يارب يتحقق ولو حلم واحد من احلامى قبل ما أموت.