حازم إمام يعلن انتهاء عمل لجنة التخطيط بالزمالك

أعلن حازم إمام، رحيله عن منصب عضو لجنة التخطيط بنادي الزمالك، بعدما تم تعيين جون إدوارد، مديرا رياضيا للنادي في المرحلة الماضية، وهو ما يقتضى انتهاء عمل اللجنة.
وفى تصريحات إذاعية، أعلن حازم إمام : "بخصوص لجنة التخطيط خلاص مبقناش موجودين ومبقاش لينا دور ومفيش حاجه اسمها لجنة تخطيط".
وأكمل: "الكلام ده قولناه من زمان اول ما يجيي مدير رياضي إحنا خلاص ملناش وجود واصلا الموضوع مكنشي بالشكل ده يعني".
وأضاف: "في حاجة مش هقول بتضايقني لكني مش مبسوط منها لما اطلع اتكلم في حته، الناس حصراني في حته حازم إمام عضو لجنة التخطيط، كأني بقول حاجه من جوا الزمالك،، لأ".
وتابع: "الموضوع انتهى تمامًا، و حالياً مش متواجدين سواء أنا ولا عمرو الجنايني وميدو كان كتب كمان، وكل التوفيق لمجلس الإدارة وكل التوفيق لجون إدوارد لو في حاجة استشاري أكيد مرحب في أى وقت من الأوقات".
وأنهى حازم إمام حديثه قائلاً: "في ناس بتقولي كلم جون فى لاعب فلاني والله هو اللى مسؤول عن كل حاجة واحنا منعرفش حاجة ومدخلناش في اي حاجه وهو اللي بيقود مع كابتن حسين لبيب والمجلس، وانا والله العظيم مكنتش اعرف مين المدرب اللى جاي، والمجلس وكابتن حسين هما اللي جابوا الناس".