مستند.. أسرة العندليب تكشف حقيقة زواجه

نشرت أسرة الفنان الراحل عبد الحليم حافظ ، رسالة قديمة بخط إحدى السيدات اللائي انتشرت شائعة زواجها من العندليب الأسمر منذ رحيله وعلى مدار السنوات الماضية .
وجاء نص الرسالة التي أرسلتها هذه السيدة الى الفنان عبد الحليم حافظ ، كالتالي :
حبيبى حليم،
"حاولت ان انام حاولت ان انام وانا اقنع نفسي
انك لابد انك ستتصل بي خصوصا بعد. ارجو انك
تخلينى اكلمك كده زى مابتكلم
وصلتني للعربيه بتاعتى نص توصيله كنت فاكره
انك ضرورى حتكلمنى في التليفون اول ماتوصل
بعد ماتكون وصلت مفيد ولكنك لم
تتصل بى ولم تفكر فى
حليم انا لا ادرى ماذا افعل اننى فى قمه العذاب
اننى ابكى وانا نائمه ابكى ليلا نهارا ولا احب
ان ترى دموعى لاننى احبك ولا اريدك تكرهنى
ولماذا تكرهنى بعد ان كنت تحبنى الان
تقول لكل الناس انا لا احبها ولكنى
احبك يا حليم. ماذا افعل قل لى يا حليم
اننى اصبحت حقيقه يا حليم اتعس مخلوقه على وجه الارض".
ومن جانبه قام محمد شبانة ابن شقيق العندليب بنشر تلك الرسالة على صفحته مأخوذة من الصفحة الرسمية لاسرة العندليب على موقع التواصل الاجتماعي "فيس بوك" ، والتي تحمل عنوان منزل عبد الحليم حافظ ، حيث علقت هذه الصفحة على تلك الرسالة بتدوينة مطولة جاء فيها : "عدى على وفاتك يا حليم حوالي نصف قرن والناس لسه بتسأل هل الإشاعة عن جوازك حقيقية ولا لأ؟

يا حليم أنت أعظم واحد غنيت للحب ومن وجهة نظري ده كان بسبب حرمانك منه من أول حب الأم اللي اتحرمت منه يوم ولادتك لحد الحرمان من حب الزوجة والأبناء." .
وتابعت أسرة العندليب :"عشان في ناس كتير بتحب تتشهر وخصوصا لما أضواء الشهرة عندها بتقل وتتطفي فيجيبوا سيرتك عشان يرجعوا تاني في دايرة الضوء.
إشاعات كتير طلعت و أنت عايش منها الإشاعات اللي كانت بتقول أنك بتتدعي المرض علشان تنال تعاطف الجمهور وإن نزيفك علي المسرح كان كذب ولما سافرت في أخر رحلة علاج طلعت الأشاعة اللي بتقول إن حليم بيتدعي أنه مسافر لندن للعلاج وهو بيتفسح ويلف العالم ورجعت بعدها مصر في تابوت وأخرست ألسنة كل اللي كانوا بيقولوا أنك بتمثل وبتتدعي المرض.."
وأضافت أسرة العندليب : "وإشاعة الجواز اللي طلعت بعد وفاتك ب 17 سنة من ناس المفروض أنهم كانوا أصدقائك وأستمرت الإشاعة بدون أي مستند أو دليل وكان نفسي ألاقي حاجة تنفيها بدليل قاطع.
أنا كنت عارف ومتأكد إنك ماتجوزتش لأنك كنت عايش لأهلك وفنك، ومرضك خلاك تخاف تتجوز وتظلم معاك زوجة وأبناء وكفاية عيلتك إللي عاشوا معاك قساوة مرضك وده اللي أكدتهولي أمي وقبلها جدتي علية الله يرحمهم ويحسن إليهم." .