"المواطن المصري": "فيديو الكشف الطبي أول ضربة ليا وأثر في شباب كتير"

"مواطن مصري سكندري، كل ذنبه إنه بيحب العصير، وعنده قطة لها متطلبات ومحتاجة أكل وشرب، دة غير إنه ما يعرفش حد في البلد دي يكلمه غير سيادة الريس، وغالباً هو الوحيد اللي بيخاطبه بشكل مباشر في كل رسايله سواء كانت رسالة عتاب، أو محبة، أو حتى تقديم طلب أو شكوى، ودايماً بيناديله ب "أسيادة الريس" .. فكان لازم نقرب منه أكتر، ونتعرف عليه ونسأله عن فيديوهاته اللي غرقت الفيس بوك بقالها فترة، وده كان حوارنا مع علاء الشيخ، المعروف ب "المواطن مصري"
البداية ..
-"أنا بقالي 4 سنين باقدم ستاند أب كوميدي، وممكن أقول إن البداية كانت تقليدي للشخصيات من وأنا صغير في عيلتي أو المدرسين، أو حتي في أعياد الميلاد، وقتها ماكنتش اعرف يعني إيه ستاند أب أصلاً فاتفرجت على فيديوهات على اليوتيوب لناس بتقدمه برة مصر، ولاقيت إن الموضوع مش بعيد عن اللي بقدمه، وعملت زي أي مواطن مصري، ودورت على جوجل على الخطوات اللي مفروض أتبعها عشان أقدم ستاند أب صح"
" دة غير إن بيساعدني في فيديوهاتي صديق ليا اسمه أحمد الهريدي، بيظبط معايا الأسكريبتات وبيختار معايا الأفكار الخاصة بعروضي عالمسرح، ولاحظنا في مرة إن هزارنا أصلاً هو مادة خام كويسة جداً للعروض"
العرض الأول ..
-"في البداية مكنش في مسرح في إسكندرية أقدم فيه عروضي، فكان أول عرض ليا في نادي خيري، ومعظم الحضور كانوا أصحابي، أما رد فعلهم فكان كويس الحمد لله، ولما لاقيت إن الموضوع حلو قررت أكمل، مع العلم إني قدمت في كذا مسابقة قبل كده وماكسبتش، بس رغم الخسارة أنا كسبت خبرة، وعرفت إزاي أضحك الناس، لغاية ما بدأت أظهر في إيفينتات خاصة، ومن بعدها قدمت عرض أستاند أب علي مسرح ساقية الصاوي وده كان رائع بالنسبة لي"
أول فيديو للمواطن مصري..
"بدأت أقدم فيديوهات من 5 أو 6 شهور تقريباً"، وتابع قائلاً: "أنا باحب أقلد الشخصيات المصرية، يعني زي الدكتورة، البنت الجامعية والبياعين، وكان عندي البرنامج اللي بيغير الملامح على جهاز الكمبيوتر بتاعي فجربته وده كان في الوقت اللي كل الناس بتتكلم عن مشروع النهضة، فقولت لنفسي لازم أقدم حاجه عنه فعملت فعلاً فيديو، وقولت لنفسي أهم حاجه الناس لما تشوفوه تتبسط وبس".
القطة وما أدراك ما القطة أسياتة الريس ..
-"بالصدفة وقت ما كنت بعمل فيديو النهضة كنت لسه شاري القطة، وكنت حابب أشوف شكل الحيوانات على البرنامج اللي بيغير الملاح ده هيبقي عامل إزاي، فطلعت القطة في الفيديو وكلمت الريس عنها"
ليه المواطن مصري؟
"اللقب ده كان اختياري للشخصية لأنه بيعبر عن كل المصريين في المواقف اللي بناقشها أو بتكلم عنها في الفيديوهات"
سيادة الريس ..
" لو سألتوا أي مواطن مصري هتقدم شكوتك لمين؟ هيقولكم للريس، لأنه باختصار بالنسبه له أكبر رمز في الدولة، والمواطن بيعتبر الريس زي أبوه وأمه"
ردود الأفعال..
"أول فيديو ماعملش أي حاجه يادوب 900 مشاهدة بس، لكن في يوم كده بعد فض رابعة وبداية الحظر واستمراره لفترة طويلة قررت أعمل حاجه بقي عن الحظر، والفيديو ده يعتبر هو الضربة الأولي للمواطن مصري لأنه عمل 800 ألف مشاهدة، فقولت لنفسي وقتها لا ده كده الموضوع بجد بقي.. ولازم أكمل، وتابع متحدثاً عن ضربته الثانية "أما بقي فيديو الكشف الطبي فكان الضربة الثانية للمواطن المصري وفيديوهاته بالنسبة لي، لأنه أثر في شباب كتير جداً مع العلم إن أي شاب بيدخل الكشف الطبي بيخرج بعده واحد تاني خالص .. أه والله"
فيديو مختلف في 2014 ..
"في الفيديو ده أنا كنت عايز أجدد في المواطن مصري وطريقته، وكنت برتب له قبل ما أنزله بشهر ده غير إني كنت محتاج أنزله في وقت قوي وبالتالي اخترت رأس السنة، وكان الجديد في المواطن مصري إني ألفت أغنية علي رتم تسلم الأيادي، بخاطب من خلالها سيادة الريس اللي مش بيرد علينا كده خااااااااااااااالوص"
آلياته ..
-"بعد الضربة الأولى ليا من خلال فيديو الكشف الطبي قعدت مع نفسي شوية، عشان أعرف وأفهم إيه اللي بيضحك الناس بالظبط، وبقيت بقدم كل مرة في الفيديوهات شكوي لسيادة الريس، ده غير إني لاقيت إن المزيكا الحزينة مع الكلام اللي بيضحك بتخلي اللي بيتفرج مش عارف يضحك ولا يعيط وبتأثر فيهم بشكل كبير"
حافز عشان يكمل المشوار..
-"من أهم الحاجات اللي مخلياني أكمل، إن الناس بتضحك لما بتشوف الفيديوهات الحمد لله، مع العلم إن ده بيحملني مسئولية كبيرة.. الفيديوهات دي أنا مابكسبش منها فلوس، بس بيكفيني إني بضحك الناس في المرحلة اللي إحنا فيها دي، وبساعدهم يخرجوا برة الصندوق ويشوفوا حاجه تبسطهم"
جديد المواطن مصري ..
-"أجدد حاجة، عملت فيديو تقليد لأحمد سبايدر، لكن هيبقي في حاجات كتير هيقدمها المواطن مصري قريب انتظروه، وانتظره بقى انت كمان أسيادة الريس.