على شاكلة فضة المعداوي.. أغرب اعترافات الحب ل أنغام في ألبومها الجديد

طرحت النجمة أنغام ألبومها الغنائي الجديد "تيجي نسيب" المكون من 12 أغنية، جسدت خلالها مراحل الحب المختلفة وغلب عليه طابع الشجن، وفي أغنية رومانسية وحيدة منه عبرت عن حبها إلا أنها لم تتخلى عن كبريائها وتعجبت من شعورها تجاه حبيبها وقالت "هو أنت مين" بكلمات الشاعرة الغنائية هالة الزيات، وألحان محمود الخيامي، وميكس وماستر طارق مدكور.
قدمت أنغام اعتراف بالحب مختلف وقالت:"هو أنت مين
علشان في ثانيه تشيل حاجات وتهد رصة ذكريات
وتلخص العمر في يومين
ليه تبقى مين
علشان تزورني تقوم تبات وجوا في سواد العين
واخبيك بالسنين ياخي الأيام معاك حلويين
وناوية معاك تدلعني
قليل منك ما يرويش عين
ولا كتيرك مشبعني
وياخي الشوق ليك واخدني لفين
ومين عنك يرجعني
يا قلبك لو عينيك نايمين
وعن نوم عيني تمنعني
بحبك كل يوم حبين
وأجيب قلبين منين يعني
هو أنت مين
علشان تعدي ومن سكات
في يفتح الورد اللي مات قبل الأوان عطشان حزين
هو أنت مين
علشان اتوه فيك بالساعات
والنبض يعزفلك نايات
وأنا قلبي دايب من الحنين".
اعتراف أنغام بحبها لا يخلو من الاعتزاز بالنفس والكبرياء الشديد، الذي يعيد للأذهان واحد من أشهر مشاهد الاعتراف بالحب الذي جمع الفنانة سناء جميل في دور المعلمة فضة المعداوي، والفنان جميل راتب في دور مفيد أبو الغار.
حينما شعرت فضة بالحب تجاه مفيد قالت له إني وقعت فيك يا دكتور، ليفاجئ بحديثها ويقول:" يا نهار اسود"، فأردفت قائلة:"وأسود من قرن الخروب، أنا يحصلي ده كله وبعد السنين دي كلها، اتقدملي رجالة بالطوابير كل واحد فيهم أنقح من التاني، مال وشباب وصحة، لكن ولا واحد ملا عيني لحظة واحدة، أقوم بعد المشوار ده كله أتروش من نظرة راجل ميسواش في سوق الرجالة تلاتة أبيض".
حوار كتبه الراحل أسامة أنور عكاشة في مسلسل "الراية البيضاء" الذى عرض عام 1988، وبرع خلاله في تجسيد شخصيتها معبرا عن قوتها الممزوجة بالتعجب من شعورها بالحب الذي هز كيانها.