إبداعات "البوابة نيوز".. "مش جاهزة دلوقتي" نص آية جواد

بص ل وراك..
مكنتش كامل الإدراك
كل اللي عدى وفات أذاك
وبقيت بتشحت بالساعات
إيدين تطبطب غير إيديك وتكون معاك
بص ل وراك..
أشخاص كتير جعلوك فُتات
نام من سُكات
وإياك تفكر في اللي فات
كل اللي فات كان ليك هلاك
نام من سُكات..
وازاي انام والجرح صاحي؟!
انا مش بخير ولا حالي عادي
والصور كدابه جدًا
مبقتش أحسن
أنا عنت أحزن
أنا مش تمام
ونفسي جدًا اني انام
اول ما بغمض وانام
بشوف كابوس..
وكأني واقفه في الصفوف
منتظرة دور الموت يجيني
الحلم ده اتكرر كتير
بمشي ف قبور واستنى دور
ميجيش عليا الدور ولكن..
عارفه جدًا انه جىّ
الدنيا عتمه
والقبور باليل تخوف
ببقى وحدى
وساعات معايا اتنين تلاته
ولسانا بيكرر يارب
وساعات بسيب الدور وبمشى
جوه القبور
واسمع كسور
وحجات كتير....
وكأنه مشهد م السعير
لكن لساني...لساه قوي
مهمًا يشوف بيقول "يارب"
َكأن وقع الكلمه "مصل"
ضد أي شيء يأثر فيا ويصيبني بأذى
الحلم ده فعلًا حقيقة
شفت مشهد م السعير
والجنه مشهد منّها
والجِن شفته كتير ف حلمى
وشفت ناس صالحين رَقوني
وحجات كتير جدًا بشوفها
مش عارفه ليه !
مع إني مش صالحه وتقية
وعصيته جدًا ربنا
بشر منيش ملاك هنا
طب ليه يجيني كل ده؟؟!
المشهد الأول.....
جهنم
الدنيا عتمه وقلبي عمَّال يتنفض
دقاته كات سريعة جدًا
ف جريت بلهفة اني أخرج م القبور
العتمة وحشة وقلبي مش مستور
ازاي يقابل ربنا !!
فجريت..
وكأني بهرب من مماتي إلى الحياة
ودعيت بخوف..
يارب هذا يكونلي حلم
سمعت..
صوت صريخ بيعلى نحوا
وسمعت صوت غليان قريب ليا
مش شايفه شيء م العتمه لكن
الصوت جعلني اصرخ يارب
حسيت بصهد كبير شمالي
ولكنّي مش شايفاله شكل
وغريبه إن يميني عكس
وكأن روح الدنيا منها !!
تمالكت أعصابى ووقفت
لمحت نور ف شمالي من نار السعير
أول ماشفت المنظر المؤسف رُعبت
من نبض قلبي حسيته بره الضلع
وكأنه بيحارب يكون
بره مسكن إتوجد فيه من زمان
جهة الشمال...
القلب معروف إنه فيه
لين لذلك نار جهنم أولي بتئذيه
أول ماحس بصهدها
طلعله حافر كان مخبيه
والوقت ده عز الحوج
دور كتير ع المفترج
لخروجه برايا عشان..
خايف أكون من أهلها
ويصيبه من نار السعير
بحوافره شق ضلوعي
ف لقيته قدامي
مهرول إلى جهة اليمين
خايف تصيبه نار سعير
وانا واقفه بين جنه ونار
الدنيا عتمه، والنور نيران
والصرخ عالي بينتشل مني الأمان
مش شايفه شيء..
ولكني حاسه
إن فيه شيء مش تمام
كل أما عيني تبص على جهة الشمال
أبعدها خوفًا م النظر ليها
مصدر صراخ سمعي كان هيّ
وكأن واحده بتستغيث بيا
نادت عليا كتير وسمعت صوت "أيه"
بصيت برعب وقلت اشوف مالها !
اول ما بصيت اتنفضت وشفتها
كانت صديقتي بس متشال جلدها
توقد نيران من تحتها
مداومة أكل ف لحمها
مع كل قطمة تنادي "أيه"
وكأنه إنذار منّها
مش عارفه تفسير للرؤى
فجريت بلهفة اني اخرج م الأذى
واتلاشى صوت اسمي اللي صادر م السعير
جريت كتير...
لحد مالقيت المفر
شبه ضىّ..جاي من بعيد
فجريت هناك
ولمحت تيته ف سكتي
حسيت برعشه ف جتتي
واحشاني جدًا نفسى اخدها ف حضني لكن
كالهوا..
صورة وصوت من غير جسد
صرخت ليها وقلت نفسي اني احضنك
ملقتش منها جواب
غير نظره من عينها
أنا كنت دايما ليها بشكيلها
كانت تطمن قلبي بوجودها
فجريت وقلت أهى فرصه واحكيلها
ف حكيت....
لمحت عينها وهي بتدمع
وقالتلي زينتك..
شوفي لبسك.. بصي جسمك
بصيت عليا صرخت م الصدمة
ملقتش جسمي لقيتني بتشفَّى !
وكأني نسخه لصحبتي السابقه
بصيت لتيتة ف ثانية ملقتهاش
بصيتلي تاني لقيتني كالأول
بالبنطلون الجنس والخلخال
وبلوزه للي لابسها كالعريان
والشعر باين مني كالعادة..
عرفت معنى الرؤيه بزياده
ساعة القيامه يارب يارب لاءا بلاش
ساعة القيامة يارب يارب لاءا بلاش
صرخت خوف يارب يبقى كابوس
هُدايا لسه مجاش..
ياربنا اهديني وروحي متاخدهاش
غير وانت راضي يارب م الجنه متحرمهاش
ساعة القيامة يارب يارب لاءا بلاش
مش جاهزه دلوقتي ياربنا
ياربنا بنهار ياربنا بنهاار..
أعمالي مش مفتاح للجنه بل للنار
مش جاهزه دلوقتي
مش جاهزه، مش جاهزه دلوقتي.