أراجوز..شعر: هشام النعال

شغال فى الموالد اراجوز
اضحك الشب والعجوز
والبنت الشقية والست اللى ضاربة بوز
اضحك الجميع وانا باكى يجوز
لكن الدمعة ما تبان
حتى لو متهان
والضحكة تكون جنان
وعمرى فى التوهان
متزحلق على قشرة موز
اراجوز
اراجوز
لعبة بزمبلك
اوقات اكون عربجى
واوقات اكون ملك
واوقات اكل لوز
واوقات انضرب بالجوز
فوق راسى لحد ما اتهلك
واوقات اكون منبوز
واوقات انول الفوز
ومن كنوز الجنة امتلك
شعورى لازم يكون مزيف
يعنى فى الصيف اشتى
وفى الشتا اصيف
ومهما اكون محترم
مش هتلاقى منى اهيف
مرة بنص لسان
ومرة اخنف
مرة كبير الودان
ومرة شكلى الطف
ضحكة اخدها بالحنان
وضحكة اخدها بالجنان
وضحكة علشان اخدها لازم اخطف
كل دة يا ولاد الحلال
علشان اخدلى كام اهيف