أهالي القاهرة ل"المسئولين": ابحثوا عن حل لتجنب أزمة الأمطار

عقب موجة الطقس السيئ والأمطار الغزيرة، التى شهدتها مصر، الأسبوع الماضى، وأغرقت العديد من الشوارع والأحياء، وبينها حى الدقى، الذى اشتكى سكانه، من وصول الأمطار لفوق الأرصفة، ودخولها للمحال التجارية والمقاهى، حيث تعددت شكواهم ما بين «إحنا مش عارفين ناكل عيش» و«خلى الحكومة تشوفلنا حل.. مش كل ما الدنيا تمطر حالنا يقف».
مطالبين «الحي» بالعمل من الآن، لإيجاد حل، لمواجهة تكرار الأزمة، وعدم الانتظار حتى تسقط الأمطار بغزارة مرة أخرى، وعبروا عن غضبهم أن المسئولين لم يتخذوا خطوة، لعلاج الخلل الذى ظهر واضحًا بشبكة الصرف الصحى، أثناء سقوط الأمطار.
محمد مصطفى، أحد سكان منطقة الدقى، وصاحب محل تجارى، عبر عن غضبه، قائلًا: «الشوارع غرقانة والمياه دخلت المحلات والناس مش عارفة تمشى نعمل إيه وغرفة عمليات المحافظة بنتصل بها، ماحدش فيها بيرد علينا» - حسب قوله.
وقال سمير أحمد: «الشوارع كانت غرقانة ومش عارفين نروح شغلنا والميكروباصات نفسها مش عارفة تمشى، يا ريت بعد ذلك تلاقوا حل أما تحصل أزمة تاني».
ويشاركه الرأى محمود عباس بقوله: «ياريت رؤساء الحى يشوفلنا حل ويكون فيه عربيات متواجدة لسحب المياه فى ساعتها، بدل ما تفضل تزيد لحد ما تبقى بركة وبتخلينا منعرفش نمشى بعربياتنا».
وقالت الحاجة أم سعيد: «حرام عليكم بجد ليه لما الدنيا بتغرق عندنا محدش بيبصلنا، ولا بيسمع لمشكلتنا حتى، لكن فى الأحياء التانية زى التجمع راحوا فى الحال حلوا لهم المشكلة، ولحد دلوقتى عدى أسبوع ومحدش حل المشاكل، الأمطار كسرت الطرق وعملت حفر، بس إحنا مش التجمع عشان الدولة تقوم ومتقعدش» - حسب تعبيرها.
صاحب محل: «الشوارع غرقانة والمياه دخلت المحلات والناس مش عارفة تمشى نعمل إيه وغرفة عمليات المحافظة بنتصل بها، ماحدش فيها بيرد علينا»