شكاوى في مكتب النائب.. ضعف المياه فى منازل "حسان حسين" بالعجوزة

تقول فاطمة توفيق: «ساكنة فى شارع حسان حسين بالعجوزة من أكتر من 20 سنة، ومشكلة المياه شفناها من فترة قريبة بسبب الإهمال والتغيير الخاطئ للمواسير، شركة المياه عملت تصليحات فى الشارع وقلنا احنا هنزود المياه، ومن بعدها بتوصلنا بالعافية واللى ساكن فى الخامس والرابع تكاد مش بتوصله، بالرغم من إنها كانت بتوصل من غير مواتير، كأنهم فتحلنا ربع فتحة فى المواسير الرئيسية، مش عارفين السبب، يعنى المياه بتقطع دايما وفى حالة وصولها تكون ضعيفة ياريت النائب «عبدالرحيم علي» يشوف لنا حل ويخاطب شركة المياه إنها ترجع المياه قوية زى ما كانت احنا هنا فى معاناة كل يوم بسبب ضعف وصولها للمنازل».
وتتابع الحاجة فاطمة لدينا مشكة أخرى وهى «السرعة الجنونية فى الشارع، الشباب اللى بيسوق الموتوسيكلات مش بيراعوا إن الشارع صغير وبيمشوا بأقصى سرعة، ودا تسبب فى حوادث للأطفال؛ بسبب إن فى مدرستين هنا فالأطفال وهم خارجين بيخبطوهم بسبب السرعات الزائدة، ياريت يرجعوا المطبات تاني بعد ما شالها الحي».