جيل بيسلم جيل.. والتاريخ ما بيتمحيش.. وحكاية النصر بتتحكي كل ليلة وفي كل مكان. عبدالرحمن حمدي طفل مصري عايش بالمملكة السعودية ورغم بعده عن مصر ودراسته في السعودية إلا أنه ديمًا يعرف اللي ميعرفهوش الكتير، ونقدر نقول إنه سفير مصر عند الأطفال العرب يقول عبدالرحمن: «بتفرج على التليفزيون ديما وبابا وماما بيحكولي إننا حاربنا وكسبنا إسرائيل، وبشوف الأفلام وإحنا بنطلع الكوبري اللي عملوه من الرمل، وفي المدرسة مش بيقولوا لنا حاجة عليه بس بابا قالي احكي لأصحابك، ورحت لأصحابي وجمعتهم وقولتلهم مصر كسبت ومحدش قدر يكسب غيرنا لأننا شجعان». أما سجي وليد في الصف الثاني الابتدائي، سألناها عن حرب أكتوبر قالت: «ماما قالت لي في حد كان عايز يسرق أرضنا وأن جدو كان في الحرب، وسألت جدو وعرفت أن إسرائيل حرامية عايزين يسرقونا وجدي قتلهم هو وصحابه وطردهم بره وإننا عندنا جيش كبير أوي كله بيخاف منه، وفي المدرسة بيشغلوا أغاني وقالوا إننا هنعمل جوايز للي يعرف عن الحرب وأنا هكسبها لأني عارفة كل حاجة عنها، بس ليه أنا بشوف في التليفزيون في حرب تانية وفي ناس بتموت و«جدو» قالي الحرب خلصت أصدق مين التليفزيون ولا المس ولا جدو ولا إحنا لسه بنحارب ولا خلصنا بس أنا نفسي أروح معاهم بس بيقوللي إني صغيرة وإنتي بنت ومينفعش، بس أنا بحب مصر أنا وصحابي».