النائبة غادة عجمي تبعث ب"رسائل للرئيس السيسي"

أرسلت النائبة غادة عجمى، عضو مجلس النواب، في تدوينه لها عبر حسابها الخاص على موقع التواصل الاجتماعي "فيسبوك" عدة رسائل إلى الرئيس عبدالفتاح السيسي، وجاء فيها:
"همسة في أذن الرئيس، أرجوك اخرج عن صمتك، وكلِّم الناس عن الحقيقة، وعرّفهم التكلفة اليومية للحرب في سيناء كام، وعرّفهم فاتورة علاج المُصابين من العمليات كام، عرّفهم تكلفة تأمين البلد والمحافظة عليه كام، عرّفهم فاتورة خراب 7 سنين كام، عرّفهم اتدفع كام عشان خراب مصر، عرّفهم المؤامرات الداخلية والخارجية شكلها إيه.
سيادتك قلت: إحنا فقراء قوي، بس ما رضتش تقول إننا فاسدين قوي! قلت: اصبروا 6 شهور مع مصر، وبشاير الفرج بدأت، والأمور بدأت تتحسن من قبل ال6 شهور ما يخلصوا والناس زعلانة!
نفسي أي حد زعلان يعرف الأرقام دي، ويعرف كمان المليارات الرهيبة المتحصلة نتيجة الفساد من مخدرات وفساد ورشاوى وسلاح ونهب وسرقة، ويكلمني بالعقل وبالمنطق، إزاي بلد تتقدم وفيها فساد مخيف بالمنظر ده! إزاي بلد تتقدم وفيها إيد بتبني و1000 إيد بتهدّ! إزاي! عرفهم إن فيه تجار كلهم جشع وطمع! عرّفهم يا ريس إن من ال100 مليون صعب إنك تلاقي حد نظيف وكفء عشان تعيّنه محافظ أو وزير! عرّف الناس الحقيقة، واخرج عن صمتك يا ريس، عرّفهم القضية 250، ولِمّ الخوَنة اللي فيها، عشان الناس تعرف إن اللي شافته مصر يخرجها من المستقبل والخريطة والجغرافيا ويدخلها التاريخ ويخلِّيها في7 خبر كان!
عرّفهم يا ريس قد إيه الأيام الجاية شايلة مؤامرات وخطر وتهديد لمصر عشان قلبت التربيزة على ولاد الحرام وحافظت على مصر والعرب! (وهنا مليون علامة تعجُّب يا شعب مصر).
(إحنا معانا ربنا، واللي يقدر على ربنا يقدر علينا)، بصراحة يا سيادة الريس من ساعة تكليفك بالمهمة لمّا كانوا بيقولوا عليك انقلابي، وأنا شايف إن كلمتك دي حقيقة.. وهتفضل حقيقة شايفينها لآخِر لحظة معاك، سيادة الرئيس: دُمتَ مؤيدًا، منصورًا، موفَّقًا، محفوظًا.
وإذا لم تجد الإنصاف من المصريين اليوم، فغدًا سيراه الجميع بسطور من ذهب في كتاب التاريخ".