قلة مندسة

أنا وأعوذ بالله من الكلمة الخلبوصة دي ، وحيد فوري ، محاور ما جبتوش ولاده ، فاهم أوي ، واعى قراطين تلاتة ، مناخيري شديدة الحساسية بتشم على بعد اتنين تلاتة كيلو بطاطا ، أنا حزين يا جمهور، وحياة حماتي أم مراتي أنا شديد الوجع والتألم والحسرة للوضع الخلطة بيطا اللي ضارب إعلامين الزمبليطة اليومين دول ، جنابي مش عارف من ده ! ، ومن المحروس ده ! ومن دي بسلامتها ، في رأي ، وخدوها من بُق محاور بورم زي حالاتي ، دول قلة إعلامية مندسة ، حرفنة في طش تومة الفتنة ، شطارة في تسويد الدنيا بالدمعة ، مهارة في الربكة وخلق عدم سيولة مرورية بين النظام والرعية بالتقلية ، لا يا قلة يا مندسة ، كده هتروحوا النار ، وأنت ياد يا مذيع يا فزلوك يا حلانجي يللي هناك ، أنا عمك الفوري خدها نصيحة من بُقي : " كُتر الهرى والنتش والتسييح ما يجيبش غير القبيح " .