رمضان شهر الجنّة.. أحمد نبيل العريني

في البداية اللي عاوز حاجة بيجري وراها و مابيملش لغاية ما تتحقق، حلم جميل نفسك توصل له، هدف نفسك تحققه، اللي بيسعى الله بيوقف معاه واللي بيقول يا رب مابيوقوعش أبدًا.
رمضان شهر الجنّة، إستعدادنا للشهر الكريم مش سهل، وإنّك تحاول على قد ما تقدر علشان تنضّف قلبك من كل حاجة ممكن تلوثه مش سهل برضه، لكن إرادتك و عزيمتك قادرة تخلي الصعب سهل، و تخليك تكون بطل في نهاية المشوار.. سهل جدًا تقول أنا بطل لكن صعب جدًا تشوف نفسك بطل، الحلم دايمًا بيكون سهل في أوله لكن لمّا بتمشي وتتعلم بتشوف قد إيه صعوبة الحلم، وإنّك توصل ل الجنّة في الآخر ده حلم سهل لكن مشواره صعب.
تقدر تسامح؟ تقدر تبدأ إنت الأول بالسلام؟ تقدر ماتزعلش حد منك؟ تقدر ماتغيّرش وشك عشان تعجب اللي حواليك؟ تقدر تحافظ على قلبك وماتبهدلهوش بغرض الحب؟ تقدر ماتقللش من قيمة حد ولا تتريق على حد؟ تقدر ماتقولش لفظ خارج عشان لسانك مايتلوثش؟ تقدر ماتضايقش بنات الناس؟ تقدر تصاحب الصاحب اللي ياخد بإيدك للجنّة؟
حاجات كتير لو حاولت تعملها صدقني هتكون بطل في نهاية المشوار، المشوار مش بس 30 يوم، المشوار حياة، لو قدرت تحافظ على مبدأك في 30 يوم هتقدر تحافظ عليه طول العمر
حاول دايمًا تكون إنت، ماتكونش زي الناس اللي عاوزاك تكون على مزاجهم، حاول تسامح عشان إنت قلبك أبيض، حاول تبتسم -إبتسامة صافية جميلة- في وش كل الناس، حاول ماتزعلش حد منك عشان ماتسيبش علامة سيئة في قلب حد، حاول ماتقولش ألفاظ خارجة عشان لسانك مايتلوثش، حاول دايمًا تسيب علامة حلوة قبل ما تموت
إبدأ شهر رمضان بقلب طيب/ نقي، حاول ماتضيعش لحظة في شهر الجنّة، طريق الجنّة مش صعب، إرادتك أقوى بكتير من كلمة صعب أو مستحيل، فبلاش تضعف أو تقلل من نفسك.. الله معاك ماتقلقش يا طيب.
عن أبي هريرة رضي الله عنه أن رسول الله صلى الله عليه وسلم قال : ( إذا جاء رمضان فُتّحت أبواب الجنة ، وغُلّقت أبواب النار ، وصُفّدت الشياطين ) رواه مسلم.