سي صابر .. البابا بتاع انتي شغاله إيه ؟

لسانك حمارك ان صنته صانك ، تاهت الحكمة دي عن نفوخ سي صابر وزير العدل المنفوخ ب " الشلوت " وطازة من وزارة العدل ، شلوت الرئاسة ل"صابر" مسبب ، ومفعل ، ومسخن ، ومبرر، ومشفوع بزلة لسان أوقعت جنابه في شر أعماله ، صابر بعد الاقالة كرر زلته ، كابر واستكبر واستعرض وآل : " لسه عند اللي قولته ماينفعش ابن الزبال يكون " قاضي" ، الهرم ما يتقلبش أبدا .. هرم وخوفو ، كده دخلت ف حارة ضلمة ياسي الوزير ، إهدى من النفخة دي ، كلنا ولاد تسعة ، افتح صفحة المساوة والحقوق ف الدستور ، راجع القانون ، قبل المراجعة والامتحان بص علي نفسك واسأل مريتك : "هو البابا بتاعي أنا كان شغاله إيه ؟؟ " .. سي صابر كفايانا عُقد توريث ، والتائب عن النفخة الكدابة كمن لا نفخه له ، وادعوا لجنابه بالرحرحة ف الجلابية بعد الخروج من الوزارة والمغفرة له من طول للسان .