أنتِ ملكة "زينة القلب" .. أحمد نبيل العريني

بالمناسبة، مش كل واحد قرأ كتاب أصبح مثقفا، ولا كل شخص حفظ القرآن الكريم أصبح داعية، مش بالأكثرية بالمفهومية، لو فاهم استمر و طوّر من نفسك، لكن لو مش فاهم حاول تفهم لأن ناقصك كتير.
حاليًا و بكل وضوح و صراحة البنت أصبحت سلعة، بنتفنن في استخدامها علشان نعمل ضجّة، ضجّة فارغة في زمن بيجبرنا إننا نتابع أخبار و تصريحات تساعدنا على الانتحار، انتحار فكري/ أخلاقي.. بقينا عايشين في دايرة هي قلعت الحجاب؟ لأ هي لبست الحجاب، و شايفين المرأة آداة بنحرّكها زي ما احنا عايزين، احنا مين؟ شخص قال رأي أصبح مفكر و عالم، شخص قرأ القرآن أصبح داعية، و احنا غلابة بنسمع و بنتابع، و مش فاهمين إن فيه ناس كتير جدًا بيحاولوا بكل وضوح إنهم يجبرونا نكون زيهم، سواء بالفكر الخاطئ أو بالأسلوب المُهين
زينة الجوهر (القلب/الروح) أهم مليون مرة من زينة المظهر (الشكل)، بنات فاهمة إن شكلها مصدر سعادتها، و بنات متأكدة إن روحها مصدر سعادتها، بنات بتجبرك إنك تقول "هي عاملة في نفسها كدة ليه؟" و بنات بتجبرك إنك تقول "الله، ربنا ينوّر قلبك و يزيدك نقاء"، فرق تفكير، شباب كتير كل همهُم إنهم يلاقوا بنت جميلة "ماشية ع الموضة" و شباب كتير كل همهُم إنهم يلاقوا بنت نقية و صادقة مع نفسها قبل ما تكون صادقة معاهم.. اختلافنا في فكرنا، في نهايتنا، النهاية دايمًا بتجبرك إنّك تبُص للبداية بصورة أوضح و بعقلية أكثر نضوج، و حاليًا ناس كتير مابتفكرش في النهاية إطلاقًا، و دي مشكلتنا.. إننا دايمًا مركزين في الوقت الحالي (النهاردة) و ناسيين تمامًا إن فيه بكرة
حاولي تثبتي لغيرك إن حجابك زينة قلبك، و إن قلبك بينوّر -حرفيًا- وانتي لابسة الحجاب، و ده مش معناه إن البنت اللي خلعت الحجاب وحشة، الجمال الحقيقي في الروح، طول ما روحك لسّه نقية طول ما شكلك الخارجي بينوّر، خلينا نتكلم بصراحة و من غير خوف، إنتي ملكة، و الملكة لازم تكون جميلة جوهريًا قبل ما تكون جميلة شكليًا، نحاول ننضّف روحنا و قلبنا علشان نكون صادقين مع نفسنا
كلمة أخيرة
مش كلنا زي بعض؛ فياريت قبل ما نحكم على غيرنا نبص لنفسنا كويس، و نشوف إذا كنا بنغلط ولّا لأ، البنت مش سلعة و إحنا مش ملايكة عشان نجبر حد أيًّا كان مين إنه يمشي زي ما إحنا عايزين، تفكيرك فوق راسي، لكن مش لازم أهتم بيه، البنت المحجبة لازم نساعدها و نحببها في الحجاب، و نخليها دايمًا شايفة إن روحها بتنوّر طول ما هي صاينة نفسها و محافظة على جمالها، و البنت اللي خلعت الحجاب نحاول نفهمها إن الجمال مش جمال المظهر، الجمال الحقيقي جمال الجوهر، و ياريت مانجريش ورا أي كلام و نعمل بيه لأن أصحاب الفكر الخاطئ أصبحوا مُسيطرين بشكل مرعب، حاولي تكوني زي ما إنتي عاوزة تكوني، حاولي تكوني ملكة.