أنتِ ملكة الحياء.. أحمد نبيل العريني

بنات كتير جدًا بتتعامل مع موضوع الحياء على إنه موضة قديمة، فكرة إنك تكوني محترمة و بتخجلي تقولي أي كلام بقت عبارة عن موضة، الجمال أصلًا هيتحول ل "موضة" قريب، بقينا عايشين وسط ناس بتتعامل مع أي بنت خجولة على إنها قديمة.. المشكلة مش مشكلة قديمة و جديدة، مشكلة ثقة في النفس.. طول ما إنتي واثقة في نفسك هتكوني ملكة قصاد نفسك، مش شرط قصاد الناس
حياؤك مش لازم يكون في خجلك و كسوفك، حياؤك في أسلوبك، تعرفي تقولي إيه إمتى و ما تقوليش إيه، عايشين في زمن الأفلام و المسلسلات اللي بتحرّض أي بنت محترمة تكون مش محترمة، الموضة بنحوّلها ل سم في العسل، و الألفاظ اللي بنسمعها بقت منتشرة بشكل مرعب، فكرة إنّك تسمع بنت بتقول لفظ مش محترم دي مش سهلة، البنت اللي في المستقبل البعيد هتكون أم، و الجنّة تحت أقدام الأمهات، تخيّل تكون ملكة، و تقول لفظ مش محترم و تعلّم ولادها الأسلوب و الطريقة دي، بعيدًا عن إن فيه أمهات كتير بتعمل كدة، و بعيدًا عن الوسائل اللي بتساعدها على كدة، فكرة إنك تتخيل إن فيه جيل لسَّه بيتولد بيقول الألفاظ دي، التخيُّل نفسه مرعب
أنتِ ملكة، حياؤك دليل قوي على ثقتك الكاملة بنفسك، و الثقة بالنفس أساس أي نجاح هتوصلي له، الثقة بالنفس هتخليكي قادرة تكسري حاجز الخوف من الناس و الخوف من أي حاجة، لكن طول ما إنتي مسلّمة نفسك للموضة اللي نهايتها الخراب الفكري و النفسي هتخسري نفسك و هتخسري إحساس إنك ملكة.
أنتِ ملكة، مش هقولك لازم تخافي من أهلك، بس حاولي دايمًا تكوني البنت اللي بيحكوا عنها في كلامهم، مش هقولك لازم تخافي من ربنا، بس حاولي دايمًا تتخيّلي وقفتك قدامه يوم القيامة و هيسألك عملتي إيه في دنيتك؟ وصلتي ل إيه؟ حاولي تحضّري إجابتك من دلوقتي عشان ساعتها تقدري تجاوبي.
خليكي زي ما إنتي عايزة تكوني، مش زي الناس اللي عايزاك تكوني شبههم، خليكي ملكة عشان نفسك مش عشان الناس تشوفك ملكة، إجري و عافري عشان هدفك، احلمي و اطردي الخوف من جواكي، جرّبي مرة واتنين و تلاتة، هتوقعي بس هتقومي تاني، خلّي دايمًا هدفك الجنّة، سواء مع صحبة حلوة أو مع نفسك، ماتخافيش تكوني خجولة، أنتِ ملكة، و الملكة حياءها دليل قوي جدًا على جمالها و نجاحها و ثقتها بنفسها.