سي حسونة نافش ريشه

جلس الرايق أفندي كعادته يحتسي شاي العصاري وهو يبرم في شاربه على مقهى جلال البو واضعا "رجل على رجل" وقد اختفى وجهه خلف كوفية صوف وطاقية أخفت شعره المدهون بالفزلين متدثرا في بالطو صوف ولا استالين في زمانه متحصنا به من موجة البرد التي تضرب البلاد وعلى مقربه منه جلس أصدقاء المقهي قشوش أفندي وأبو الحمد أفندي... وعلى غير العادة جلس حسونة الراصد الذي يعمل في هيئة الأرصاد الجوية، وقد تهافت رواد المقهى عليه في السلام والكلام معه والسؤال عن أحوال الطقس وتقلباته.
وما إن رآه الرايق أفندي حتى صاح أيوه ياسي حسونة شايفك قاعد نافش ريشك علينا تقلش محافظ شرم الشيخ في عز الشتا ..
حسونة: إيه يا عم الرايق مستكتر علينا يومين الناس تسال فيه وتيجي تكلمني وتستفسر وتتقصي مني وتطلب ودي وتحاسب لي علي المشاريب دول يادوب هما يومين في الشتا واسبوع في الصيف وبعد كده بخ يا محترم .. عامة الناس ولا بتسأل فيه ولا بتعبرني ايكش بس بتوع المطار وبتوع الموانئ هما اللي مداومين علينا بالتليفونات طول السنة ..
الرايق أفندي: ماشي ياعم حسونة قلي هو أنت طول السنة بتعمل إيه كده وفهمني بسلامتك؟
يرد حسونة وقد انتفخت وجنتاه واحمرت فبان توهجهما رغم برودة الجو: حقك تسأل ماهو اللي ميعرفش يقول عدس أنا الراصد يا رايق أفندي اللي بشوف الريح رايحه فين وجايه منين انا اللي بفهم السحاب وهي طايره بقف في عز البرد أقيس سرعة الريح بجهازي وأعرف قد إيه نزل مطر عشان أعرف المطر ده هيكفي نروي الزرع عشان يخضر ويطرح عشان تأكل منهم البهايم ولا المطر مش هيكفي البهايم يا رايق افندي فاهم البهااااايم
الرايق: الموضوع بتاع المطر ده مهم قوي كده دي المطره بتنزل تغزق الدنيا وتزفلط الشوارع
تعملها برك
حسونة: أيوه من حقك تتريق ما أنت بتشرب من زير مفتوح قصدي من نهر النيل مش عايش في الصحرا ولا عارف إن نقطة المطر ليها ألف حساب وحساب ومن غيرها الناس تهج والزرع يموت وكل من له كبد يطفش.
ويرد الرايق وقد لسعه كلام حسونة اكثر من العاصفة: عندك حقك
وبعد ثواني من الصمت بينهما قطعها قشقوش أفندي بحديثة بعد سعله سريعة: بس أقولك يا حسونة موجة البرد دي رغم صعوبتها لكنها فايدة لناس وناس ماهو انت شايف بتوع البطاطا والدرة المشوي شغالين الله ينور وكمان اللي بيبيعوا جونيات وطواقي صوف بقوا اكتر من بياعين عصير القصب اهي سبوبة حلوة برضه للناس الغلابة وتلقيك انتوا برضه يابتوع الارصاد هتعملوا لكم سبوبة حلوة من موجة الحر دي يعني تلقيكم خدتوا بدل عاصفة وبدل صقيع وبدل رطوبة.
يرد حسونة: وحياتك يا قشقوش بيه مافيه ولا مليم زيادة بس كلام في سرك بيقولوا انهم هيعملوا لنا سبوبة نسترزق منها هيخصصوا رقم مختصر كده زي 900 تتصل بيه يديك درجات الحرارة ويقلك تلبس ايه وتقلع ايه وانت خارج من بيتكم وكمان هيبقي فيه رقم تشترك فيه توصلك النشرة الجوية فيه على موبايلك كل يوم.
وفي نفس واحد قال معظم من في المقهي هتكون بكم في اليوم
ورد حسونة ب30 قرش في اليوم بس وأخذ يتممتم يافرج الله السبوبة اشتغلت.