الرايق أفندي بارم شنبه

جلس الرايق أفندي كعادته يحتسي شاي العصاري وهو يبرم في شاربه على مقهي جلال البو، واضعا رِجْل على رِجْل وقد اختفى وجهه خلف كوفيه صوف وطاقية أخفت شعره المدهون بالفزلين متدثرا في بالطو صوف ولا استالين في زمانه متحصنا به من موجة البرد التي تضرب البلاد وعلى مقربه منه جلس أصدقاء المقهى قشوش أفندي وأبو الحمد أفندي ....وعلى غير العادة جلس حسونة الراصد الذي يعمل في هيئة الأرصاد الجوية وقد تهافت رواد المقهى عليه في السلام والكلام معه والسؤال عن أحوال الطقس وتقلباته ..
وما أن رآه الرايق أفندي حتى صاح أيوه ياسي حسونة شايفك قاعد نافش ريشك علينا تقلش محافظ شرم الشيخ في عز الشتا .. يومينك وخدهم يا حسونة
حسونة: إيه ياعم الرايق، مستكتر علينا يومين الناس تسال فيه وتيجي تكلمني وتستفسر وتتقصى مني وتطلب ودي وتحاسب لي على المشاريب دول يادوب هما يومين في الشتا وأسبوع في الصيف وبعد كده بخ يا محترم
عامة الناس ولا بتسال فيه ولا بتعبرني يكش بس بتوع المطار وبتوع الموانئ هما اللي مداومين علينا بالتليفونات طول السنة ..
الرايق أفندي : ماشي ياعم حسونة قلي هو أنت طول السنة بتعمل إيه كده وفهمني بسلامتك
يرد حسونة وقد انتفخت وجنتيه واحمرت فبان توهجهما رغم برودة الجو: حقك تسأل ماهو اللي ميعرفش يقول عدس أنا الراصد يا رايق أفندي اللي بشوف الريح رايحه فين وجايه منين انا اللي بفهم السحاب وهي طايره بقف في عز البرد اقيس سرعة الريح بجهازي واعرف قد إيه نزل مطر عشان اعرف المطر ده هيكفي نروي الزرع عشان يخضر ويطرح عشان تاكل منهم البهايم ولا المطر مش هيكفي البهايم يا رايق أفندي فاهم البهااااايم
الرايق : الموضوع بتاع المطر ده مهم قوي كده دي المطره بتنزل تغزق الدنيا وتزفلط الشوارع
تعملها برك
حسونة : أيوه من حقك تتريق ما أنت بتشرب من زير مفتوح قصدي من نهر النيل مش عايش في الصحرا ولا عارف أن نقطة المطر ليها الف حساب وحساب ومن غيرها الناس تهج والزرع يموت وكل من له كبد يطفش
ويرد الرايق وقد لسعه كلام حسونة أكثر من العاصفة : عندك حقك
وبعد ثواني من الصمت بينهما قطعها قشقوش افندي بحديثة بعد سعله سريعة : بس اقلك يا حسونة موجة البرد دي رغم صعوبتها لكنها فايدة لناس وناس ماهو انت شايف بتوع البطاطا والدرة المشوي شغالين الله ينور وكمان اللي بيبيعوا جونيات وطواقي صوف بقوا أكتر من بياعين عصير القصب أهي سبوبة حلوة برضه للناس الغلابة وتلقيك انتوا برضه يابتوع الارصاد هتعملوا لكم سبوبة حلوة من موجة الحر دي يعني تلقيكم خدتوا بدل عاصفة وبدل صقيع وبدل رطوبة
يرد حسونة: وحياتك يا قشقوش بيه مافيه ولا مليم زيادة بس كلام في سرك بيقولوا إنهم هيعملوا لنا سبوبة نسترزق منها هيخصصوا رقم مختصر كده زي 900 تتصل بيه يديك درجات الحرارة ويقلك تلبس ايه وتقلع إيه وأنت خارج من بيتكم وكمان هيبقي فيه رقم تشترك فيه توصلك النشرة الجوية فيه على موبايلك كل يوم
وفي نفس واحد قال معظم من في المقهى هتكون بكم في اليوم
ورد حسونة ب30 قرش في اليوم بس وأخذ يتممتم يا فرج الله السبوبة اشتغلت.