اسماعيل ياسين فى الانتخابات

بعد ثورة 25 يناير 2011 التى انفجرت بقدر الله تعالى وحوله وقوته وحفظه وعنايته،تغيرت الظروف السياسية فى مصر ، وعدّلت الدولة قانون الأحزاب السياسية،فأصبح يمكن تأسيس الحزب بضوابط معينة وإخطار لجنة شئون الأحزاب به ،وهى لجنة تابعة لمحكمة النقض بعد زوال صفوت الشريف.
قامت جماعة الأساتذة السلفية فى المسجد التى إنضم إسماعيل يس إليها بتأسيس حزب سياسى ،وكان هو من الأعضاء المؤسسين .ثم جاء موعد الانتخابات البرلمانية ،فاختار الحزب إسماعيل يس ليرشح نفسه فى انتخابات مجلس الشعب لما له من محبة وشعبية عارمة.
اقتنع إسماعيل يس بالفكرة واتصل بصديق قديم له يعمل بالمحاماة خارج القاهرة ليقدم له المشورة القانونية ويساعده فى الإجراءات وهو الباز أفندى ،ساقط ابتدائية.

تم فتح باب الترشيح وقبول طلبات الراغبين فى الترشيح ،فذهب إسماعيل يس ومعه المحامى إلى مصلحة الترشيح فى مجمع المصالح بميدان التحريرلتقديم أوراقه .كانت الساعة تناهز العاشرة صباحا وصعدا للدور ال13 بشق الأنفس لأن المصعد المخصص للمواطنين قام كبار الموظفين بتخصيصه لأنفسهم وتقدم إلى عطية افندى وهو رجل ضخم الجسم يشبه تماما الفنان الراحل رياض القصبجى .
- الباز أفندى :أنا محامى المواطن ده وعايز أقدم
طلب الترشيح.آه..
- معاك ما يثبت إنك محامى؟ فين كارنيه النقابة؟
- أنا الباز أفندى ، ساقط إبتدائية..آه.. تخصص
قضايا ومحاكم وخُلع وبتاع كله ..آه.. معنديش
كارنيه ..آه ..
- إزاى ياجدع انت ساقط ابتدائية وتقول إنك محامى؟
- الباز أفندى: يا افندى عضو مجلس الشعب نفسه صاحب
السلطة التشريعية ،اللى بيشرع القوانين لا يُشترط
حمله لمؤهلات ، ؟ وأقرا المادة الخامسة فقرة 4 من
قانون مجلس الشعب رقم 38 لسنة 1972 بتقول كفاية
أنه بيعرف يقرا ويكتب يبقى فيها أيه إن أنا أكون محامى.
- إسماعيل يس:أه والنبى ياخويا ، دا مولود فى قلم
المحضرين ، ولفّوه فى ورق القضايا
وكان زى الفار بياكل الأحكام..نى نى نى ...
نظر عطية افندى إلى إسماعيل يس نظرة فاحصة تأمُلية
وقال فى نفسه " هوه..هوه بغباوته وتناحته " ثم سأله؟
- إنتا يا جدع إنتا خدمت معايا فى الجيش زمان ؟
- مين ؟ شاويش عطية ؟ إزيك يا شاويش ؟ أنا العسكرى
اسماعين.. سمعة !! لسه فاكرنى؟ نهاننا فُنّ ..
-هات ورقك ،إسمك أيه يا عسكرى؟
- إسماعيل يس يا فندم ..
-إيدك على ميت جنيه رسوم الكشف ..
- ليه؟هوه انتوا لامؤاخذة حاتكشفوا على البروستاتا؟
- بطّل غباوة بقى ،حا نكشف على اسمك فى الكامبيوتر
نشوف اسمك دستورى واللا مش دستورى ..
- الباز أفندى : ايه الكلام ده يا عطية افندى؟هوه
فيه إسم دستورى وإسم مش دستورى ؟
- أيوه ..الإسم اللى مش دستورى هو اللى فيه شعارات
دينية من اللى ممنوع استخدامها فى الدعاية
الانتخابية . أدفع الميت جنيه وانتظر نتيجة الكشف.
بعد 4 ساعات :
- عطية افندى : المواطن إسماعيل يس : ورقك مرفوض
ياسيد ، الكامبيوتر بيقول إن اسمك دهه مذكور فى
القرآن الكريم "إسماعيل و يس "ودى شعارات دينية
عاوز انت تستغلها فى الدعاية الانتخابية عشان
تستثير مشاعر العامة وتتلاعب بعواطفهم الدينية
فينتخبوك ، وده ممنوع لأنه بيهدد" عبد السلام
الاجتماعى".وكمان فى الدعاية الانتخابية ممنوع
تستخدم شعارات دينية وإلا شرطة الانتخابات تقبض
عليك و تروح السجن .
- إسماعيل يس :يعنى لا مؤاخذة لو فى المؤتمر
الانتخابى قلت فى كلمتى بسم الله والحمد لله
والصلاة والسلام على رسول الله يعملوا لى أيه؟
- أهى دى تاخد فيها تأبيدة ،ويمكن كمان
يعدموك.غيّر إسمك يا سيد وتعالى..

سحب إسماعيل يس أوراقه واختفى فى أضابير أجهزة
الدولة لعدة شهور حتى نجح فى تغيير اسمه واستخراج
بطاقة بالاسم الجديد، ثم عاد إلى عطية افندى :
- خلاص يا شاويش عطية ،غيرت إسمى اللى مش دستورى
من إسماعيل يس إلى إبراهيم حم !!

أوشك عطية افندى أن يأخذ بتلابيب إسماعيل يس
ولكنه استحصل منه على ميت جنيه لزوم الكشف على
دستورية الإسم الجديد.

بعد أربع ساعات :
- عطية افندى: الكامبيوتر بيقول إن الإسم ده برضه
غير دستورى لأن مقطعى الإسم مذكورين فى القرآن ،
وده بيهدد عبد السلام الاجتماعى ..
- إسماعيل يس : طب ممكن وحياة والدك تسأل
الكامبيوتر :ممكن أسمّى نفسى زكريا نون ،أو يحي صاد؟
- إيدك على 200 جنيه رسوم الكشف .
بعد 4 ساعات :
- عطية افندى : الكامبيوتر هنّج ياسيد وبيقول :
قولوا لإسماعيل يس بطّل غباوة بقى..كفاية كده
- إسماعيل يس:طيب ممكن نسأل الكامبيوتر أيه الإسم
الدستورى اللى يرضى عبد السلام الاجتماعي الله
يخرب بيته ؟
- عطية افندى :إيدك على 500 جنيه لزوم تخليق إسم.
إحنا حانصورك بالكامبيوتر وش وقفا وفوق وتحت ونكتب
كل بياناتك ، وبعدين الكامبيوتر يخلّق لك الإسم
الدستورى اللى لايق عليك.
بعد 4 ساعات :
- خلاص يا عسكرى اسماعين ، الكامبيوتر خلّق لك
الإسم اللى يليق معاك وهو :
"عفراكوش أبو حافر" ..
- أيه ياخويا الإسم العفاريتى ده ؟ حافر أيه؟ هوه انا حمار؟
- يا عسكرى اسماعيل : الكامبيوتر بيقول إن ده
الإسم اللى يمشى مع عقلك المقفول ومخك الضِلم. روح
اعمل بطاقة بالإسم الجديد وتعالى .
سحب إسماعيل يس أوراقه مرة أخرى واختفى فى أضابير
أجهزة الدولة لعدة شهور حتى نجح فى تغيير اسمه
واستخراج بطاقة بالاسم الجديد، ثم عاد إلى عطية افندى :
- خلاص ..أنا غيرت البطاقة للاسم العفاريتى
الحمّارى الجديد "عفراكوش أبو حافر " خلص لى بقى
الورق الله يعمر بيتك عشان أنا جعان برلمان وعطشان حصانة..
- عطية افندى :سؤال فى الحساب : تلاتة اتقابلوا مع
تلاتة وقعدوا مع بعض، تعرف تقول لى المجموع يبقى كام ؟
- أيوه أعرف بس لمّا الأول تقول لى التلاتة دولهمن
مين و التلاتة دوكهمن يبقوا مين، و اتقابلوا فين
وعشان ماذا.....تررلم..
- الباز أفندى: أنا أعترض على توجيه هذا السؤال
لموكلى لأن الشرط ده مش موجود فى القانون ،مش مُهم
أن موكلى يعرف مبادئ الحساب....آه..
- عطية افندى : يعنى بتاع البطيخ فى الشارع يبقى
عارف الحساب عشان يحاسب الزباين ،وعضو مجلس الشعب
مايعرفش؟
- الباز أفندى :القانون كده يا عطية افندى ،راجع
المادة المذكورة أعلاه.
- عطية افندى لعفراكوش أبو حافر " إسماعيل يس
سابقا " :أنت تصنيفك أيه يا سيد ؟
- عيب يا فندم دا أنا مُذّكّر..
- يابنى أدم يعنى انت عمال وفلّاحين؟ واللا فئات؟
لازم تحدد وتقدم المستندات .
- الباز افندى : وليه التحكم ده يا عطية أفندى؟ ده
فيه عدد كبير من ظباط الشرطة دخلوا مجلس الشعب فى
انتخابات 2010 على أنهم عمّال زى السمكرية والميكانيكية..
- عطية أفندى :مالناش دعوة يا جدع انت ، الموضوع
ده اتفحص فى مجلس الشعب ، وسيد قراره قال إنهم
عمّال ،يبقوا عمّال.. بلاش غلبة ..
- إسماعيل يس :خلاص ،أنا عُمّال .
- عطية أفندى:عندك إثباتات بمستندات رسمية ؟
- لأ ما عنديش ..
- يبقى ورقك مرفوض ياسيد .روح هات شهادة من نقابة
عمّالية وعدّل المهنة فى البطاقة واثبت فيها مهنتك العمّالية .
سحب إسماعيل يس أوراقه وراح يبحث عن مهنة عمّالية
يكتبها فى البطاقة.ولما كان لا يجيد أى صنعة أو
حرفة ،فقد اقترح عليه الباز أفندى مهنة سهلة
لا تحتاج إلى خبرة أو مهارة وهى أن يشتغل "زبّال "،
فذهبا إلى نقابة الزبّالين للسؤال عن كيفية الحصول
على شهادة من النقابة تثبت أنه زبّال .

لواء د. عادل عفيفى .
adel.afify@gmail.com