قصيدة تنشر لأول مرة بيان حال.. أبو سحنه تيفال

أبو سِحْنَه تيفال ؛
حامل أختام المارشال ..
اللي طالع له ف كف فضيلته طلوع ..
من لُطَع البوس
واللي بطقم السوس الْمُدهَب .. نَسِّل لحمي {{{
يبلع منه اللي يكَفّيه
ويقلع بيه اللي مَعَرّيه
راكن مع دلاديله في الممنوع ..
بيسَوِّي السم القَتّال
من حاصل ضرب الناقع في المنقوع !!.
وطرح المفرد م المجموع
واقف يروي عطاشي الروح ..
مَلْحُه المسْقي بِميِّة نار !!.
زفُّوه يا عيال
هذا المكسي العريان .. أبو سحنه تيفال
لا عيبَه بتلْزق ،
ولا خيبه تحَوَّقْ
شغّال علي مرقة سَلْقُه
والطبخه اللي مشيَّطْها بلسعة عقلُه ..
أهي بايته ف تلجُه ،
وتوب قصاقيصُه اللي بيستر كِدبُه
متفَصَّل علي باترون من رسْمُه
واخَد مقاساتُه ..
من قبل ولادته .. بألف ونص
عاش أوقاته ..
صيف أو شتا أهو دايمًا لابسه
وان مسكت جسمُه الرعشة يبُص ..
ينُطْ براسُه ، برَّه الخُص
وينسف روح ..
طيَّرت النوم من عين إجرامُه
ويرجع راسي ..
تحت كراسي وجزم السلطة !!.
ياما اتمسكن ، واما اتمكن ..
قام مسنود ، مفرود ، متعنطز
بأوامره العارجة المرجيحة ..
ينفخ خوفه ف جوف بلالينه
ويطلق فينا .. شرور أسافينه
يطَفِّي النور ، ويولَّع فيه ..
يمشي يمين .. مدَّرْوش ،
ويخُش شمال .. يتكلْبش
دقنُه قطيفة ؛
وبتتمسح في اللي فوقيه
تقلب جيفه ؛
لو هجّوا الساكنين تحتيه
من غير ما يفَنَّط ورقُه ، يضَبِّش
وشعاره ؛ الطاعه العميا !!.
وقراره ؛
مغزول علي نول " كُلوا باميه " !!.
أبو جبهه بشحم ،
في عيونُه العورَه .. منجم فحم
ما شايفش ف سطح مرايته ،
غير بسملته
وزوابعه الدايره ف فنجانه ،
لدواعي أمانُه
شاطر في الخبص ، وفرض الضيقه ،
ويعرف امتي ف غيبة شمسُه ..
يقيمها حريقه
وعشان ما تدور .. في أرضه البور ..
عجلة أمجاده
يدوس في بلادنا ويرمح فيها
علي طراطيف إرشاده
يشحن في بيادقه وزوّادُه
" ساووا صفوفكم ..
ما تخلوش الفُرْجه ما بينكم
وأقيموا صلاة الحاضر بعد غياب
وانووا صيامكم ..
عن كل ملذّات الدنيا الغاب ..
إلا اتنين ..
أولها ؛
قُعادكم علي نَفَس الكل
وتانيها ؛
جمع زكاة المال من طوب التل
هِمُّوا وزفُّوا شريعة الحق ؛
وعريسها كبيركم ..
بكره يخلِّف منها ومنكم
نص شريعته :
" النعمه تخص ، والنقمه تعُم "
والكلمه اللي ف بق أهْيَفْكُم
رشوها مبيد علي مجري النيل
آدي حكاية غُصنه الشوم
أدبل فرع ف شجرة آدم !!.
هِمْ يا ولدي .. وما تعيلش الهم
ما بيقدر ع القُدْرَه .. إلا مالكها
واللي اتربي ف حضن الماضي ..
ما اتعلِّمْش ازاي يملُكها
وانت بطَمي تاريخ سلسالك ..
مجداف في فلوكها
أما النسخ المسخ الطالع
من صندوق إنعاشه
هُوَّ الشيخ المطاهر ..
يوم طلعة روحه المفضوحه ..
علي رف معاشه !!.