طرح الغياب

البت اللى عملت معايا الحلو كله
قبل ما تموت ع الكرسى الهزاز
ف نص الصاله
ميل ووشوشها الشتا
طرح الغياب يشيب
سمعت كلامه
ومن ع وش إيدى
خطفت لمسه
فيها كل معانى الطبطبة
فاتتلى كل مزازيك الذكرى
ترن ف طراطيف صوابعى
ونزلت مدافن الشوق برجليها
نزلت سرحانة ف معناة كلامه
لا عملت حسابى ف حته خلى
ولا وصت الليل عليا
الشتا من غيرك طاح بى
والمطر ما يقسى
غير ع الوحدانى
وانا زى البيوت الطين
الشوق هو هو الحنين
ابعتيلى من عندك
عيال ف الحب طالعة جديد
تسند بكفوفك حيطانى