قصيدة البشاير

من يناير كل عام
يدخل النور الزنازن
يطرد الخوف والظلام
يا نسيم السجن ميل
عالعتب وارمي السلام
زهر النوار
وعشش في الزنازين الحمام
من سكون السجن صوتي
نبض قلبي من تابوتي
بيقلوا لك يا حبيبتي
كلمتي من بطن حوتي
سلميلي عالحبايب
يا حبيبتي
سلميلي
كل حب وله نصيبه من سلامي
بلغيله
احضني العالم عشاني بين عيونك
وابعتيلي نظرة
منها أشوف حبايب واشفي قلبي
واسأليلي كل عالم في بلدنا
كل برج وكل مدنه
كل صاحب من صحابنا
كل عيل من ولادنا
حد منهم شاف علامة من علامات القيامة
قبل ما تهل البشاير يوم 18 يناير
لما قامت مصر قومة بعدما كانت في نومة
تلعن الجوع والمذلة والمظالم والحكومة
سلميلي عالولاد السمر خضر العمر
في عموم الحواري
سلميلي عالبنات المخطوبين في المهد لسرير الجواري
واسأليلي بالعتاب كل قارئ في الكتاب
حد فيهم كان يدق بعد جهل وبعد نوم
أن حس الشعب يسبق أي فكر وأي صوت
هي دي مصر العظيمة
يا حبيبتي هي مصر
اللي فضلت في هواها عشنا
علي ألف قصر
هي دي يا عزة مصر
هي دي يا عزة مصر
أحمد فؤاد نجم
يناير 1977 سجن ليمان طرة