العيد إسكندراني

عيدنا.. جينا وعيدنا..
يا محلي لمتنا.. ويا محلي بهجتنا..
العيد عيدنا.. يا إسكندراني .. يا ابن حتتنا..
سمعنا زفتنا.. وارسم حكايتنا.. ع
الرملة.. والشط فرحتنا.. ولملم حكايتنا
واهديها لعروستنا.. دي إسكندرية
جميلة.. لو تعرفوا قيمتها..
وعلي كورنيشها .. نغني غناوينا.. ونلضم أسامينا.. الفلة ويا الياسمينا مع منير.. والحجار وهو بيغني ليها في لياليها وبحرها مع داليدا وهي بتقولها حلوة يا بلدي.. ونعلي ضحكتنا وننسي اللي جري لينا..
ونقول بعلو الصوت .. مع همسات الناي والفنون.. يارب تكمل أعيادنا يارب تكمل فرحتنا .. وخارطة طريقنا.. تكون تالت حكايتنا.. مع مجلس شعب.. يضم من الشباب أحباب عقول تعرف تكتب علي جدران الزمن فصول روايتنا.
يا عيد.. يا فرحة.. يا ضحكة يا عيد .. الدنيا إيه غير قلب سعيد.. وعيون بتضحك ويا العيد.. وشموع حبايب.. جاية تقيد.. والبهجة تجري مع المواعيد.
دي إسكندرية ياناس أجمل ما في الوادي لما ينادي علي ولادي حتي اسألوا كل السواحلية م الإسماعيلية لبورسعيد لدمياط ومطروح وكل من عدا عليها وشاف حسنها البادي وصلي علي النبي([) في أعيادي.
والعيد ياناس .. مش عيدية.. وهدية وطفل بيلعب جنب مرجيحة.. العيد أمان وحضن ومحبة وسلام وكلمة صافية تطلع من القلب صادقة صريحة مريحة.. ويا سلام بقي لما تكون صلاة العيد جاية بدون تهديد أو وعيد .. لافيها سلفي ولا إخواني والكل يعرفني من عنواني.. مصري ابن مصري لافينا مجني عليه ولاجاني.
والله ع الأدان.. لما يجيلك من أكبر ميدان ميدان المساجد .. ميدان المرسي أبوالعباس.. وسيدي ياقوت العرش.. والبوصيري.. ولمة الناس .. والإحساس بكل الناس.. ولما تتمشي شوية للقلعة وتشم هوي البحر .. تتوه.. ترتوي بعطر السحر في وشوش البشر والناس.
وياسلام لما تخطف رجليك وتروح لقصور المنتزه وشاطئ المعمورة وميامي وجليم وتفتكر عبد الحليم .. ومعاه ندق الشماسي.. ونقول لكل ناسي.. يا محلي إسكندرية اللي فيها أهلي وناسي.
وهي بتعيد وبتصبح وبتمسي علي المرسي والمراسي.. فولكة يا هانم .. مركب يا بيه بس خللي بالك من ولاد الإيه بلطجية الشواطئ واللي اسمهم أبصر وما أدراك إيه - خليك ناصح يا صاحبي وابعد عن الشر وغنيله.. واحترس من نشالين العيد.. وخليك دايما سعيد.. واخطف رجليك وحط ولادك بين عنيك واتمشي ع الكورنيش مع حبة ترمس وحتة فريسكا.. وبعدهم عايز إيه تاني .. روق يا عم الأناني.
وكل عيد.. ونعيد.. مع عمنا حجاب ابن سيد.. ونقول في عيد الفطر يارب الستر.. والفرحة من غير غدر.. والضرب بإيد من حديد.. علي كل إيد تستحق القطع ويا البتر .. وترجع لينا لمتنا.. وعيدنا يبقي فرحتنا.. وإسكندرية تصبح عروستنا نزفها كل عام علي بحر محبتنا.