گل أسبوع

نقطة.. ومن آخر السطر

نعم أحس الناس .. من أول أسبوعين من وزارة محلب الثانية، بتواجد الوزراء ورئيسهم.. في الشارع، ويتواجد المسئولون: تنفيذيين وأمنيين. في الحملات المرورية، وفي إزالة فوضي الباعة الجائلين.. وبعد كل ده، تفعيل قانون المرور.. وتشديد العقوبة علي المخالفين.. مع توفير أماكن بديلة للباعة فورا.. وبلاش حكاية حاوريني يا كيكة.. أو لعبة القط والفار. بين الباعة وشرطة المرافق.. يعني الحكومة تعمل كبسة.. وبعد ما تمشي بثانية.. ترجع ريما لعادتها القديمة! وترجع مملكة الرصيف.. ومملكة الميكروباص.. وسواقين الميكروباص.. كل ده .. جميل..
بس لسه.. الناس ماحسوش بالحاجات الكبيرة، اللي تقوم دولة.. مش تمشيها.. بالمسكنات.. أو الأنتي بيوتك؟
لسه الناس.. في شوق لسماع الأخبار المفرحة عن المشاريع العملاقة.. اللي حنبدأ فيها فورا. ودي لأولادنا.. وأحفادنا من بعدنا.. لسه الناس مستينة تسمع أخبار حلوة.. عن المشاريع الكبري اللي موجودة بالفعل.. وإيه اللي تم فيها: في توشكي.. وفي بدايات محور قناة السويس.. ولسه الناس.. عاوزة تشوف خطة طموحة لوزارة محلب، اللي مش مؤقتة.. ومقاتلة لغاية آخر رمق في عمرها. والخطة الطموح لازم يكون لها مدي زمني قصير.. ومتوسط.. وطويل المدي.. وكلها في صالح الشعب.. اللي مستعد يصحي الساعة 7 الصبح كل يوم علشان يشتغل.. مش ينام تاني.
واللي مستعد يضحي بكل غالي ونفيس
علشان.. يشوف المية 24 ساعة في اليوم.
والكهربا بلا انقطاع.. وانتهاء لمشاكل رغيف العيش.. أو أنبوبة البوتاجاز، والنظافة في الشوارع.. والطوابير اللي مالية حياتنا: من سولار لبنزين.. والذي منه؟!