فيها حاجة حلوة

لو عاوز تشوف الحاجات الحلوة إللي في مصر تقدر ترصدها بكل سهولة لأنها أصبحت واضحة للجميع وضوح الشمس..تلاقي مثلا شبكة طرق عملاقة تحس وانت ماشي عليها انك في أوربا..تتفرج علي السمك وهو طالع من المزارع وتحس ان الخير موجود..تشوف التجمعات السكنية الجديدة وتسأل هي اتبنت امتي وتقول إيه الحلاوة دي..تتفرج علي ما كيت محطة الضبعة النووية وتحس ان مصر بتتقدم بجد..تشوف الحفر في الشوارع علشان الخط التالت لمترو الإنفاق تقول نستحمل شوية علشان هيحل أزمة المرور...تتفرج علي العاصمة الإدارية الجديدة وتحس اننا بقينا دولة فيها حكومة بتنفذ إللي بيتقال ومبقاش الموضوع كلام وبس..تقعد تتابع جوائز الكاف وتلاقي مصر بتحصد 3جوائز وتفرح لمحمد صلاح وتحس انه ابنك أو اخوك وتفرح لكوبر رغم التقطيع إللي الراجل خده بس في الاخر طلع هو الصح لانه نجح انه يوصل للهدف..كمان تفرح ان الشعب اتحرك مع الدولة لمواجهة الاٍرهاب وان عّم صلاح نجح هو وولاد حلوان الجدعان في القبض علي ارهابي بعد ما الشرطة اتعاملت مع الموقف بكل حرفيه..تفرح كمان لما تلاقي الدولة بدأت تتحرك بجد في تنمية سيناء وتشوف ماكينات حفر الإنفاق وهي بتخرج من النفق علشان يبقي عندنا انفاق جديدة تربط سيناء بالوادي..كل دي حاجات حلوه تقوم بلاد بس احنا اتعودنا ندور علي السلبيات بس..صحيح في ارتفاع أسعار بس كمان لازم نقول ان البلد بذلت جهد كبير علشان تسيطر عليها بس هنقول إيه للجشع والاستغلال..أنا مش عاوز أقول ان احنا وصلنا للكمال.. بس زي ما احنا بنبص علي السلبيات لازم كمان نبص علي الايجابيات والحاجات الحلوه علشان يبقي عندنا أمل علي طول..نسيت أقول ان الرقابة الادارية نجحت لحد كبير في تحجيم الفساد..وان ابطال الجيش والشرطة نجحوا في محاصرة الاٍرهاب بدرجة كبيرة جدا..وان مصر استعادت مكانتها علي الساحة العالمية..وان السياحة بدأت تستعيد عافيتها..بس لازم واحنا بنتكلم عن الإنجازات نخلي بلنا اوي ان العدو لسه متربص بينا ونفسه نقع مع بعض وتتفكك وحدتنا..كل إللي بيتحقق في مصر مجاش بالصدفة..ده جهد وعرق ودم وراجل وطني اسمه عبد الفتاح السيسي قاد الدولة في اصعب الظروف ووعد الناس بحياة كريمة وعلي قد ما قدر وبأقل الإمكانيات حقق إنجازات ملموسة..صحيح الشعب عاوز أكتر علشان احنا تعبنا كتير بس مفيش حاجة بتتحقق من غير جهد..لو عاوزين نشوف مصر قد الدنيا بجد يبقي لازم نشتغل كلنا ونحافظ علي ما تم انجازه ونفكر ازاي نكمل المشوار مع الراجل إللي شال كفنه علي إيده وتحدي العالم علشان ينقذ مصر..خلوا بالكم..فيها حاجه حلوة بجد..وتحيا مصر.