اخر اخبار مصر اليوم : تعيين حسني مبارك مسشارا للرئيس مرسي

أنا غير مؤمن أو مقتنع بأن الرئيس السابق حسني مبارك قد أصدر أي أمر بقتل متظاهري 25 يناير أو موقعة الجمل أو غيرها وأن الحكم عليه بالسجن المؤبد كان حكما سياسيا، وأنه ربما يأخذ براءة في محكمة الإستئناف. وحسنى مبارك له خبرة طويلة في السياسة المصرية ويمكن للرئيس الحالي محمد مرسي أن يستفيد من تلك الخبرة، فعل سبيل المثال توقفت مصر عن الإقتراض من البنك الدولي منذ عام 1993 حتى أتت حكومة مرسي وأقترضت مبلغا كبيرا يقارب الخمسة مليارات دولار مرة واحدة.
وقد تخيلت أن الرئيس مرسي بعد أن وقع الفأس في الرأس وأصبح رئيسا لمصر وإنتقل من عمله الأكاديمي كأستاذ للهندسة في جامعة الزقازيق إلي رئاسة أكبر وأفقر دولة عربية وأصبح مسئولا عن كل شئ في البلد إبتداء من الأعمال الإرهابية في سيناء وإنتهاء بسعر الطماطم في سوق الخضار!! وقد فوجئ الرئيس مرسي بحجم المشاكل والتى تراكمت أكثر أثناء وبعد 25 يناير، وقد طرد الرئيس مرسي كل أعضاء حكومة مبارك ومساعديه في مكتب الرئاسة وجاء بوجوه جديدة معظمهم لا دراية لهم إلا بولاءهم لمرسي وللاخوان.
وقد وجد مرسي نفسه مضطرا للإتصال بالرئيس السابق مبارك في مستشفي سجن طرة:
مرسي: إزيك ياريس
مبارك: مين؟ مش سامع؟ زعق شوية.. (مخاطبا علاء مبارك الذي يعتني بوالده) شوف مين يا علاء كده؟
علاء: ده الدكتور محمد مرسي
مبارك: مين قاعد ع الكرسي
علاء (رافعا صوته): لأ يا بابا مش كرسي ده الدكتور محمد مرسي
مبارك: آه وعاوز إيه؟ عاوز يشمت فيّ؟
علاء: مش عارف؟ إتفضل كلمه
مبارك: إزيك يا دكتور مرسي
مرسي (رافعا صوته هذه المرة): إزيك ياريس ؟
مبارك: والله فيك الخير يا دكتور لسه بتقوللي ياريس
مرسي: ده شئ ما حدش يقدر ينكره، زي أمريكا الرئيس السابق ينادى بلقبه (مستر بريزيدنت)
مبارك: والله كويس، يعني مش الرئيس المخلوع زي الجماعة بتاعتك ما بيقولوا عليّ؟
مرسي: العفو يا ريس، إنت قدمتك إستقالتك.
مبارك: إيه خير يادكتور مرسي، وإيه المناسبة السعيدة إللي خلتنا نسمع صوتك، وقبل ما أنسى مبروك على الرئاسة وربنا يعينك
مرسي: رئاسة إيه يا ريس، دي طلعت مصيبة تقيلة أنا مش عارف إنت أزاي أستحملت 30 سنة، أنا بقالي 3 أشهر ومش مستحمل
مبارك: أنا أستحملت عشان بأحب البلد وأقولك تاني بيت الشعر:
بلادي وإن جارت علىّ عزيزة
وأهلي وإن ضنوا علىّ كرام
مرسي: أنا قصدك في طلب بس أرجو ما تكسفنيش؟
مبارك: إوعي تكون عاوز تسألني عن الفلوس الوهمية إللي بيقولوا إني مخبيها في بلاد برة
مرسي: لأ يا ريس فلوس إيه، إحنا فيه بينا وبين بعض فلوس
مبارك: إمال إيه خير
مرسي: أنا عاوز أبقى أتصل بيك من وقت للتاني عشان أسألك وأستفيد من خبرتك الطويلة
مبارك: يعني عاوزني أكون مستشار لرئيس الجمهورية
مرسي: عليك نور، لأن البلد مليانة بلاوي، إنت كنت قادر تمسك البلد دي إزاي
مبارك: دي حكاية طويلة، وأنا على العموم لو الموضوع ده فيه خير لمصر أنا مستعد أعمله
مرسي: إنت عارف إن ده شعار حزب الأخوان "نحمل الخير لمصر"
مبارك: أن شاء الله كل خير، وعلى فكرة عاوز أقول لك مبروك على خطوة إقالة طنطاوي وعنان إللي طلعوا زي الفيران وطعنوني من الخلف وطعنوا عمر سليمان الله يرحمه وكمان أحمد شفيق
مرسي: إللي فات مات ياريس، وإحنا ولاد النهاردة، وأنا يحصل لي الشرف إني أستشيرك في أمور حكم مصر بس مش حاأقدر أعلن الموضوع ده على الملأ، وأرجوك ده يفضل سر ما بيننا، وأنا حأعطيك رقم تليفوني السري وإستشاراتك بيننا تكون تليفونية وسرية، وأنا تحت أمرك في أى طلب، لو عاوز ترجع مستشفي المركز العالمي أو أي مستشفى أخرى أنا تحت أمرك.
مبارك: أنا الحقيقة ما ليش اي طلبات بخصوصي، أنا لي طلب واحد
مرسي: أؤمر ياريس
مبارك: أنا بس لي طلب بخصوص جمال وعلاء، مش دول طلعوا براءة خليهم يرجعوا لولادهم وأمهم بقى ...كفاية بهدلة
مرسي: بس إنت عارف ياريس طول مطلوبين في قضايا تانية
مبارك: أظن إنت وأنا أكثر ناس عارفة القضايا الملفقة، إنت نفسك والأخوان كنتم ضحايا لقضايا ملفقة كثير، خف شوية عن الولاد، وهو ده شرطي الوحيد
مرسي: أوعدك إني أكلم أحمد مكي (وزير العدل)
مبارك: عاوز أسمع خبر كويس قريب.
مرسي: أن شاء الله، وبعدين كنت عاوز أسألك عن النكت إللي كانت بتطلع عليك، ما كانش بتزعلك
مبارك: ما كنتش بأسمعها كلها، أنا من أيام ما كنت نائب السادات وأنا عارف موضوع البقرة الضاحكة، لكني أنصحك تسمع من هنا وتفوت من هنا، وبعدين بطل تصريحاتك الكثيرة، كل شوية تخطب، في جامع تخطب، في دول عدم الإنحياز تخطب، في مكة تخطب، في الأمم المتحدة تخطب، في التليفزيون تخطب مش معقول، كل ما تتكم كثير حتغلط كثير والناس تنتهزها فرصة عشان يطلعوا عليك نكت، وبعدين بالذمة الناس تشتكي من زيادة الأسعار تقول لهم المانجة رخيصة؟؟ إتهريت تريقة يادكتور مرسي على موضوع المانجة ده، لكن أكثر واحدة عجبتني:
وما نيل الطماطم بالتمني
ولكن تؤخذ المانجة غلابا
نصيحتي لك في الموضوع: إتكلم كثير تغلط كثير، أتكلم قليل تغلط قليل
مرسي: شكرا يا ريس ع النصيحة الغالية
مبارك: إنت تؤمر يا دكتور مرسي، ومش عاوز أوصيك تاني على علاء وجمال.
مرسي: مع السلامة ياريس
مبارك: مع السلامة يادكتور مرسي
نقلا عن إيلاف