أسرار تنشر لأول مرة في حكاية «عز وزينة» !

توصلت وكالة أنباء "هريدي نيوز" إلى حقيقة مشكلة أحمد عز الممثل مش بتاع الحديد ومش أي عز يبقي فلول، المهم أن الأزمة الأخيرة اللي اتفجرت بين أحمد عز والفنانة زينة وشغلت الرأي العام المصري والعربي قول والعالمي أصلها أزمة تجويع شعب بحاله، المشكلة دي طلع محرر هريدي نيوز عنده تفاصيلها بالكامل.
يقول محررنا: إن أحد مصادره اللي هم تربوا في مركز تدريب "الفشر العالمي" لما سمع بالأزمة دي طار ولف كام لفة وحام نحو أطراف المشكلة ورجع بشوية مستندات تؤكد انها مشكلة حلها بسيط جدا.
يضيف المحرر: زينة كانت بحسب مصدره الفشار بتمثل فيلم أمام أحمد عز واتجوزته وقبل "شُط الجواز" الأخ عز عرض عليها يضربوا ورقتين عرفي علشان الكلام في المشهد يبقى طالع حقيقي، والبنت ياعيني ما كدبتش خبر وماصدقت، لأن دا برضو عز وإن كانت مش طايلة حبيب القلب الأصلي اللي هو تامر حسني يبقى تطير بعز نجم بنات القاهرة الكبري والمقيمين خارجها.
يؤكد المحرر أن الواد عز مااكتفاش بأنه يضرب ورقتين ويقول كلمتين لاء اتجوزها بجد، وفي الآخر عايز يتنصل من عياله، وكده دا لو في الصعيد كان اتقال عليه المثل اللي بيقول إنه "خسيس وواكل ناسه"؛ لكن البحاروة ياعيني ما يعرفوش أنها أعراض وكأن مصر خلصت مشاكلها ما فيش غير عز وزينة، راح عز الحديد وجانا عز الحبيب !