ضحك وسخرية وتنمر.. كوكتيل الكوميديا الافتراضي

كل حاجة مباحة في الفضاء الافتراضي وعالم السوشيال ميديا، دي قاعدة معروفة ومعمول بيها، والضحك على السوشيال ميديا تريند طول الوقت، الضحك بسبب أو من غير سبب، الكوميديا في السوشيال ميديا ليها وجوه كتير، غير الكوميديا اللي نعرفها، إيفيهات ومواقف وكده، الكوميديا في السوشيال ميديا غير..
المسألة تخطت فكرة الاجتهاد الشخصي أو المحتوى الفردي وامتدت مع مرور الوقت إلى مدارس وجماعات، وبقت منظمة إداريا، لدرجة إن صفحات وحسابات على السوشيال ميديا عملت طلب توظيف واختبارات للي عايز ينضم ليهم علشان يتريق أو يتنمر ويسخر من الناس وعلى الناس ويقدم حالة من الضحك.. في السطور الجاية هنعرفكم على أبرز الحسابات على السوشيال ميديا اللي بقت علامات في الكوميديا والضحك..
1- في المرتبة الأولى يجي تجمع «بيس كيك»، اللي عندهم أكتر من 23 مليون متابع على «تيك توك»، وبيزيدوا كل فترة، تجمع «بيس كيك» مش تجمع عادي، لكن تجمع تجاري واقتصادي في المقام الأول، انشأه 5 شباب هم كريم أبو جمرة، وهو CEO الشركة، ومعاه أحمد يوسف ومروان إمام وراندا حبيب وأحمد صافي والخمسة معنيين ومهتمين بالمحتوى الخفيف، لكن مش هم بس الشركة، فالشركة والجروب كل يوم بيتوسع وبيزيد وبيضم مجموعة جديدة، منهم اللي بقى من المشاهير، زي ملك دهشان ويحىي الصادي وحازم راغب وغيرهم، «بيس كيك» دخلت شراكة مع شركات كتير زي شركة طارق الجنايني المنتج السينمائي اللي قدم «الحريفة»، الشركة ليها برامج كتير، زي «مافيوسا» و«امسك نفسك»، واسكتشات كتير، وبتعتمد على السخرية من كل حاجة، وكل حد إلى درجة التنمر على الناس وعلى نفسهم.
2- السبت الممتاز مش هو السبت اللي بيلعب فيه محمد صلاح وعمر مرموش في الدوري الإنجليزي، لكن دا اسم محتوى بيقدمه إياد الموجي عنده حوالي 14 مليون معجب، إياد اللي بدأ في أكتر من حاجة، وأكتر من محتوى يبدو أنه لقى أخيرا المحتوى اللي ممكن يطرح اسمه كمنشئ محتوى كوميدي وظريف، إياد شارك في كتير من محتويات الكوميديا، زي «مبقتش حمل» و«أصلي أصلي» مع مجموعة من المؤثرين زي يحيى عزام ومروان سري وعمر خالد، لكن السبت الممتاز هو الإنطلاقة الأكبر والأهم لإياد اللي دخل في حرب قبل كده مع المؤثرة كنزي مدبولي، واللي بتقدم محتوى كوميدي هي كمان، وفي «السبت الممتاز» بيستضيف إياد نجوم الكوميديا والمؤثرين علشان يعلقوا على مشاهد من السوشيال ميديا.
◄ اقرأ أيضًا | في ذكرى ميلاده.. إبراهيم نصر أيقونة الكوميديا وصانع البهجة
3- أحمد حسن وأحمد مجدي.. ثنائي بدأوا من خلال السوشيال ميديا وانطلقوا إلى عالم الأستاند آب كوميدي، وشاركوا مع مجموعة «بيس كيك» قبل الانفصال وتقديم «ستوديو الإثنين»، الحلقات اللي حققت انتشار سريع بسبب خفة دم الثنائي اللي اقترب عدد معجبيهم من 3 مليون، وهو رقم يبدو قليلا لكن الحقيقة أن مجدي وحسن قرروا توزيع الأحمال على أكثر من حساب على «تيك توك» تحديدا، لكن لو جمعنا أرقام حساباتهم هتتخطى العشرين مليون معجب.. محتوى مجدي وحسن هو أيضا «ريأكت» على فيديوهات ومقاطع مصورة، وهو المحتوى الرائج على «تيك توك» ويقدمه عشرات من الحسابات، ومن ال«تيك توكر»، لكن مجدي وحسن أصبح ليهم مكان عند متابعينهم بسبب عفويتهم التي تراها في كثير من فيديوهاتهم، بالإضافة لسخريتهم اللاذعة، حتى على نفسهم وأهلهم.
4- أكثر من 4 مليون متابع لحساب زينة أحمد على ال«تيك توك» ويقترب حسابها على «إنستجرام» لمثلهم .. الموهبة المصرية التي ضحت بكلية الطب من أجل شغفها وحلمها بالتمثيل، والحقيقة أن زينة بخفة دمها وتلقائيتها التي تقدم بها مواقف كوميدية من حياتها اليومية دون ابتذال أو تصنع، زينة التي قررت مؤخرا دراسة المسرح يبدو إنها على الطريق الصحيح، فربما نكون أمام ممثلة موهوبة فعلا، وكوميدية أكيد.
5- «أحمد رمزي ممثل بإذن الله»، هكذا كتب اليوتيوبر والمؤثر الكوميدي في «البايو» الخاص به على «يوتيوب»، ويبدو أن أمنيته تحققت أخيرا بعد تحمس المخرجة ساندرا نشأت لتقديمه في مسلسل كوميدي قريبا من بطولته، أحمد بيدرس التمثيل في المعهد العالي للفنون المسرحية عنده قاعدة جماهيرية كبيرة على السوشيال ميديا، وعلى «تيك توك» عنده أكتر من 2 مليون متابع، و19 مليون معجب، وعلى كل وسائل التواصل الاجتماعي عنده زيهم تقريبا، أحمد بيقدم سكتشات تمثيلية بصحبة أصدقائه، كان ليها أثر كبير، حتى أنه في الفترة الأخيرة أقنع بموهبته وتفرده عدد كبير من النجوم عشان يشاركوا في فيديوهاته القصيرة كضيوف شرف، بالإضافة إلى برنامج «اللعب مع الهزار» اللي بيقدمه على «يوتيوب»، أحمد موهبة مختلفة وكوميديان حقيقي ومكسب للدراما.