أمير كرارة في حوار خاص ل«بوابة أخبار اليوم»: نفسي أعمل كل حاجة والجمهور يفضل يحبني

في تصريحات خاصة ل«بوابة أخبار اليوم»، تحدث النجم أمير كرارة عن كواليس مشاركته في فيلم «الشاطر»؛ الذي يُعرض ضمن موسم الصيف، وأعرب عن حماسه الشديد للعمل الذي يراه مختلفًا عن كل ما قدمه من قبل.. كما كشف عن نظرته للحياة الفنية والشخصية، وأمنياته المستقبلية، في حوار صريح جمع بين العفوية والصدق... وإلى تفاصيل الحوار..
بداية.. كيف ترى مشاركتك في فيلم «الشاطر»؟
أنا متحمس جدًا للفيلم، لأنه مختلف فعلًا في فكرته وتنفيذه.. بحب دايمًا أقدّم حاجات فيها جديد، وهنا بتعامل مع مخرج محترم وفعلاً بيفهم كويس في الكوميديا. من وجهة نظري هو أحسن مخرج كوميدي في مصر دلوقتي.
ما رأيك في فريق العمل المشارك معك في الفيلم؟
الكاست مميز جدًا، معايا مصطفى غريب وهنا الزاهد وأحمد عصام، وكمان ضيوف شرف كتير زي النجم عادل كرم من لبنان، ومحمد القس، وغيرهم ناس كويسة جدًا وحقيقي مبسوط بالشغل معاهم.
هل يمكنك أن تشارك الجمهور بعض الكواليس؟
بصراحة مش هقدر أقولكم حاجة عن الكواليس، لأن الفيلم نفسه هو الكواليس! كل لحظة فيه متصورة بروح خفيفة ومليانة طاقة، وهتشوفوا ده بعينكم في السينما وهتتبسطوا إن شاء الله.
هل تحب أن يراك الجمهور في نوع معين من الأدوار؟
لا خالص، أنا نفسي الجمهور يشوفني في كل حاجة، وفي أي حاجة. نفسي أفضّل دايمًا قريب من الناس، وأتمنى يفضلوا يحبوني دايمًا زي ما أنا بحبهم.
حدثنا عن الجانب الإنساني في حياتك.. ما الذي يمثل لك الأولوية؟
ولادي وعيلتي دول حياتي. بصراحة، ماعنديش أي حاجة تانية في حياتي غير شغلي وبيتي وعيالي. دول أهم حاجة عندي.
ومَن وقف بجانبك في بداية مشوارك الفني؟
الحقيقة مفيش حد معين، كل الناس اللي قابلتهم كانوا محترمين، ومفيش حد بيبخل على حد بمعلومة أو نصيحة. كلنا بنتعلم من بعض، وده سر النجاح الحقيقي.
ويُعرض فيلم «الشاطر» خلال موسم صيف 2025، وهو من إخراج أحمد الجندي، ويجمع بين الكوميديا والتشويق بمشاركة نخبة من نجوم الفن في مصر والوطن العربي.
اقرأ أيضا| كرارة: ماحدش ساندني في البداية بشكل مباشر في الفن.. بس كلهم ناس محترمة| خاص