أمينة وسى السيد شات جى بى تى !

احم احم

فينك ياسى السيد تيجى تتعلم الكلام الحلو بدال الطوب اللى بتحدفه عليا
- مساء الخير عليك يا سى الشات جى بى تى!
- مساء النور عليكى يا سيدتى كيف لى أن أساعدك ؟
- لو ع المساعدة فأنا محتاجة مشورتك فى حاجات كتير بس الله يكرمك ممكن تكلمنى بالعربى وبلاش الكلام النحوى المجعلص ده ؟!
- ها ها ها أحظك الله يا ست أمينة وهل ترين أنى أتكلم الإنجليزية أو الفرنسية،، بل هى العربية يا أم فهمى؟!
- ما شاء الله تبارك الله وكمان عارف اسمى ياسى الشات جى بى تى ؟! وأنا اللى مكنتش مصدقة الواد كمال ابنى لما قالى انك بتعرف كل حاجة وممكن ترد على اى سؤال !!
- بالمناسبة كيف حال كمال وفهمى وعائشة وخديجة وياسين ؟!
- بيبوسوا إيديك ياخويا،،بسلامتك تعرف ولادى كمان؟ لأ بقى تستاهل أبخرك لتتحسد على نباهتك،،ومن شر حاسد إذا حسد.
- لا داعى لكلمات المجاملة وأخبرينى أيتها الشابة كيف أساعدك ؟!
- شابة ؟ الله يستر أصلك ياشيخ على لسانك اللى بينقط عسل،، وعلى كده تقدر تعرف سنى كام يا سى الشات جى بى تي؟
- هذا أمر مستحيل فأنا مثلما قال العندليب الأسمر فى أوبريت قاضى البلاج الوارد فى فيلم أبى فوق الشجرة: أفتى كل الفتوات وأعرف فى اللوغاريتمات والنسبية والذرة إلا عمر الستات،،لكن إن كان لى أن أخمن فأعتقد أن عمرك يتراوح بين العشرين والثلاثين!
- عشرين تلاتين سنة؟ روح ياشيخ اللهى يجبر بخاطرك،، فينك ياسى السيد تيجى تتعلم الكلام الحلو بدال الطوب اللى بتحدفه عليا واللى كل مايشوفنى يقولى كبرتى يا أمينة وشكلى هتجوز عليكى؟
- تقصدين السيد أحمد عبد الجواد؟!
- أشتاتاً أشتوت ألا هو انت كمان تعرف جوزى سى السيد؟!
- نعم نعم وأعرف أيضاً جليلة وزبيدة وزنوبة وكذلك العالمة باتعة!
- جليلة وزبيدة وزنوبة معروفين لكن تطلع مين الست باتعة دى كمان يا سى الشات جى بى تى ؟
- لا عليك يا ست أمينة ولن يفرق معكى كثيرا إذا كان يعرف خمسة ولا ستة ولا حتى ستين سيدة غيرك! كلها ترهات غير مجدية ومن فضلك أخبرينى كيف يمكن أن أساعدك
- على رأيك ياخويا ولو انى مش فاهمة يعنى ايه ترهات دى بس مش موضوعنا.
- حسناً أدخلى فى الموضوع من فضلك فليس لدى كثير من الوقت!
- طيب طيب ماتزعلش الموضوع وما فيه ان سى السيد جوزى هاملنى يا سى الشات جى بى تى ومش بيهتم بيا زى ما بيهتم بشغله وسهراته بره البيت والراجل اللى لسانه مش بيبطل كلام مع أصحابه فى التليفون وهاتك ياضحك ومسخرة تلاقيه واكل سد الحنك لما أعوز أتكلم معاه ومش بينطق غير حضريلى الأكل يا أمينة ده غير انشغاله مع الموبايل وكلامه فى السياسة اللى مش بافهم فيها حاجة طول ماهو فى البيت وانت عارف بقي
- نعم نعم أعرف وأشعر بالتعاطف معك تماماً ،،كما أعرف أنه أيضاً زملكاوى شارب المر ليل نهار،لكن هل تريدين أن أقدم لك نصائح تساعدك فى جذب انتباهه لك مرة اخرى ؟!
- ينوبك ثواب الله لا يسيئك قولى أعمل إيه ؟!
- هل تشعرين بأى تغير على ملامحه إذا شاهد امرأة جميلة على شاشة التلفاز ؟!
- لو التلفاز ده يعنى التلافزيون يبقى اقدر أقولك إن عينه بتكون عايزة تطلع منه لما يشوف اى ست حلوة خصوصاً هيفاء وهبى ولا نانسى عجرم والست سيرين!
- تقصدين شيرين آه ياليل؟
- لا ياخويا سيرين عبد النور أصل البعيد ملوش فى المحلى!
- إذن كونى مثلهن يا ست أمينة ودلعى زوجك حبة وإلبسى كما يلبس هؤلاء النسوة،، هل تريدين أن أنصحك ماذا تلبسين له اللية مثلا فينبهر بك عندما يعود وينسى السياسة والزمالك؟!
- ياريت ده يبقالك الحلاوة يا سى الشات جى بى تي!
- هل تذكرين قميص النوم الأحمر القصير الذى اشتراه لك مؤخراً،أين هو ؟
- وهو انت مكشوف عنك الحجاب للدرجة دي،،عجايب والله عموما القميص أنا وديته للخياطة يا خويا من يومين ولسه ماجبتوش من عندها!
- وماذا يفعل عند الخياطة ؟!
- قولتلها ياخويا تركبله أكمام وتعمله بطانة وتطوله متر ولا مترين علشان أعرف ألبسه!
- طب باقولك إيه يا ست أمينة ممكن الله لا يسيئك تعملى كوباية عصير وتحطى فيها كثير من سم الفئران ؟!
- أعوذ بالله لالالا مش للدرجة دى عايزنى أقتل أبو عيالى يا سى الشات جى بى تى ؟
- لا ياولية عايزك تجيبهالى أنا علشان أشربها وأرتاح من أم الشغلانة دي!