- ماتسيب المجلة اللى فى إيدك دى يا سى السيد وتقعد تتحدت معايا شوية. - استنى بس يا أمينة أما اخلص الموضوع المهم إللى باقراه - طب ماتحكيلى يا سى السيد بتقرا إيه - بلاش تعرفى يا أمينة لأن الكلام المكتوب ممكن يزعلك - يزعلنى ليه كفى الله الشر ياخويا، وبعدين طول ما أنت فاشخ بُقّك ومبتسم كده وفرحان وانت بتقرا يبقى أنا كمان حاكون مبسوطة. - يعنى متآخذنيش الموضوع ده حساس شوية. - ولا يهمك ياخويا وهو يعنى انت من إمتى بتحس بيا وباللى يزعلنى ؟ قول ياراجل قول وفرحنى معاك. - بيقولك ياستى العلماء البريطانيين، الإنجليز يعنى عملوا دراسات أثبتت إن الراجل اللى يبص للستات الجميلة ذكاؤه بيزيد وعمره كمان بيطول؟ - قصدهم يعنى الستات الجميلة زى زبيدة وجليلة العوالم بتوعك يا سى السيد؟ - مش بالظبط يعنى لكن تقدرى تقولى حاجة زى كده - اسمحلى ياسى السيد واضح إن دى دراسات أونطة. - ليه بقى يا متنورة يابرميل النباهة؟ - العمر ده بإيد ربنا وحده، لكن بالنسبة للذكاء مثلا أديك أنت ياخويا منقوع وسط العوالم وسايبنى وحدى طول الليل ومش حاسة يعنى إن بقى عندك مفهومية ولا ذكاء زيادة بالعكس كل ماتكبر كل ما يعنى متآخذنيش عقلك بيبقى على قدك. - طب اتلمى يا أمينة واحمدى ربنا إنى مباعرفش عليكى غير بس زبيدة وجليلة، إيش قولك بقى إن الدراسات البريطانية أثبتت إن الراجل طبيعى مننا لازم يقع فى الحب سبع مرات على الأقل فى الشهر؟ - سبع مرات إزاى يعنى يا سى السيد إذا كان الإنجليز دول أصلا عندهم برود ومعندهومش حرارة فى مشاعرهم،طب دى حتى الست سعاد حسنى قالتها من زمان:عنده برود أعصاب اسم الله ولا جراح بريطانى؟ - يا ولية باقولك دى دراسات علمية، يعنى اتعمل عليها تجارب ياما قبل مايقولوها ويطلعوها. - عموما ياسى السيد خد راحتك وحب يارب حتى مليون واحدة فى الشهر.. أنا على فكرة عمرى ما حلمت ياخويا إنك تحبنى وحدى ومن يوم ماعرفتك اكتشفت إنك طفس. - غريبة يعنى عمرك ماحلمتى إنى أحبك وحدك؟ - لا لا لا الست مننا اللى بتفتكر إن جوزها ممكن يحبها وحدها تبقى واهمة يا سى السيد..كفاية على الواحدة مننا تكون بس من العشرة الأوائل فى قلب جوزها. - طول عمرك عاقلة وقنوعة يا أمينة، طب تعرفى إن الدراسات البريطانية برضه أثبتت إن الراجل مننا بيحتاج حوالى 24 بوسة وييجى 16 حضن فى اليوم عشان يقدر يحافظ على صحته كويسة؟ - وهما بسلامتهم العلماء البريطانيين دول ماقالوش لو كان ده من ست واحدة ولا كام بالظبط؟ - لا هم سابوا العدد مفتوح، بس مافتكرش يعنى من ست واحدة مافتكرش فيه ست تقدر تتحمل كل ده ماتآخذنيش يعنى إلا لو كانت جاموسة. - ولا فيه راجل يقدر على ده ياسى السيد إلا لو كان عجل ولا مؤاخذة! - شكلك عايزة تروحى على أمك تاخديلك شهرين تلاتة. - أحب على يدك سامحنى ياسى السيد، أمى التكييف عندها عطلان وليك عليا مافتحش بُقّى تانى وخلاص اقرا انت مجلتك براحتك وأنا خلينى مع المحمول. - أيوه كده صنف يخاف مايختشيش. - الحق الحق يا سى السيد شفت الراجل بيقول إيه فى الفيديو ده؟ - خير بيقول إيه ؟ - بيقولك ياسيدى إن الدراسات البريطانية أثبتت إن العرب هما اللى بيألفوا كل الدراسات البريطانية!
