دعاء فاروق: «عانيت في جوازي مع زوجي وكنت بعيطله عشان يجي معايا الحفلات»

حلت الإعلامية دعاء فاروق وزوجها عماد مختار، ضيوفًا على برنامج واحد من الناس، المذاع عبر شاشة قناة الحياة، والذي يقدمه الإعلامي عمرو الليثي، وكشفت الأولى أصعب لحظات حياتها.
اقرأ ايضا|دعاء فاروق تكشف أسرار وكواليس لأول مرة حول إصابة زوجها بالسرطان
وقالت الإعلامية دعاء فاروق في حوارها مع الإعلامي عمرو الليثي: جوزي سي السيد، وعانينا في جوازنا، لأني في بداية جوازي كنت ست عندي لسان وبتكلم وبتناقش لكن هو فيه حاجات عنده مفيش فيها نقاش ودي حاجة ما كنتش فاهماها وهو كان عاوزني أقول حاضر من غير نقاش فضلنا كتير علشان نولف مع بعض.
ورد عليها زوجها عماد مختار: دي حقيقة في حاجات ممكن ناخد وندي فيها ونتناقش وفيه حاجات مفيهاش مناقشة وهي بتكون عارفة أنها مفيهاش مناقشة وبتتكلم فيها، زي أن حد يعزمنا قبل الميعاد بيوم وده بالنسبة لي عدم تقدير، واحنا اتجوزنا بسرعة ملحقتش أعرف صحابتها ولا طبيعة ظروف عملها وأنا راجل شرقي.
وأضافت دعاء فاروق: زمان كنت أعيط له علشان أروح حفلات القنوات وتعالى معايا ما يوافقش أقول له أروح لوحدي يرفض، والحاجات دي ممكن تخرب بيوت ولكن احنا تخطيناها، وكبرنا وعقلنا، ودلوقتي لو فيه حاجة كده هيقول مفيش مشكلة روحي لأننا عشرة عشرين سنة وعارف أوي أنا إيه لكن في الأول كان قلقان عليا.