سفير كوريا الجنوبية: «أنا حاسس إنِّي وصلت القاهرة امبارح»

ودع السفير هونج جين ووك سفير كوريا الجنوبية في مصر ، الصحفيين المصريين وبعض اصدقاءه الدبلوماسيين ، ب«السلام عليكم» ، قائلاً "أنا حاسس إنِّي وصلت القاهرة وسَلِّمت عليكم امبارح بس عَدّى حوالي تلت سنين الوقت بيعدي بسرعة. مش كده؟عشان كده مش مِصَدَّق إني خلاص بَوَدَّعكم دلوقتي
كنت مبسوط جدا طول الثلاث سنين اللي فاتت ، بالرغم من أزمة كورونا والمشاكل الاقتصادية . مؤكداً لكن مَقِدْرُوش يُقَفُوا في طَرِيق صَداقة مصر وكوريا بالعكس بَقِت العلاقات بينهم أحسن".
وتابع سفير كوريا الجنوبية خلال كلمته بمؤتمر صحفى اقامه السفير بمنزله لوداع الصحفيين والدبلوماسيين المصريين ، أكيد بسبب حرب أوكرانيا كان فيه مشكال اقتصادية في البلدين لكن بالعكس السنة اللي فاتت التجارة بين مصر وكوريا زادت حوالي 40 % ، كما زاد التصدير من مصر لكوريا حوالي 160 %
وقال السفير هونج جين ووك ، قبل ذلك انتج البلدين مُنْتَجات made in Egypt مثل التليفزيونات والغسالات، والسنة الماضية قررا البلدين صناعة تابات و موبايلات و ميترو. وكمان قرروا يعملوا محطة الطاقة في الضبعة.
واستطرد السفير هونج جين ووك ، في شهر أغسطس الماضى بعد رفع التَحْذِير السِياحي من على مُعظم الأماكن فى مصر ، جاء كوريين كثر لزيارة مصر للسياحة. معلناً عن قرب وجود طيران مُباشِر بين كوريا ومصر قريباً . كما يستعد كوريين كتير للسفر لمصر عشان يشوفوا الطبيعة الجميلة في الغردقة وشرم الشيخ ودهب وأيضاً الأماكن التاريخية مثل الأهرامات والأقصر وأسوان. غير كده كمان في كوريين كتير بيتعلموا عربي، وكمان عدد الكوريين المسلمين والمساجد بيزيد كل شوية.
وأشار السفير هونج جين ، إلى أن عدد المصريين اللي بيحبوا الثقافة الكورية زي اللغة الكورية والدراما والأفلام والأكل الكوري بيزيد كتير. غير كده بدأ تدريس اللغة الكورية في جامعة سوهاج وكفر الشيخ مش بس في جامعة عين شمس وأسوان. وكمان عدد طلاب معهد سيجونج زاد أكتر من عشر أضعاف. كما أن عدد المشجعين المصريين لفرق الكيبوب بقى أكتر من مليون مُشجع. كمان عِرفت إن اِتعَمَل جروب على الفيسبوك باسمي للناس اللي بتشجعني. عشان كده دايما بقول إني أسعد سفير كوري في العالم.
وأوضح السفير هونج جين ، أن رئيس كوريا ورئيس البرلمان الكوري زارا مصر خلال الثلاث سنوات الماضية . وكانت هناك اِتِصَالات تِلِيفونية ورَسَايِل كِتير بين الرئيس السيسي ورئيس كوريا الجديد (يون). وكمان وُزراء وصحفيين كتير من البلدين سافروا كتير بين مصر وكوريا وعَملوا مَجهود كبير عشان يِسَاعْدوا التعاوُن بين البلدين.
وقال السفير هونج جين ، أكتر حاجة أنا فخور بيها إن الكوريين والمصريين اللي موجودين هنا بِيعَامْلُوا بعض باحتِرام، وبيتمنُّوا إن البلدين يتطوروا سوا في المستقبل.
واستطرد ، زي ما بقول دايما، حتى لو الحكومات اتغيرت الشعب واحد مبيتغيَّرش. عشان كده أنا شايف إن الشعب هو أهم حاجة. لازم نِفْهَم ونِحْتِرم ثقافات بَعْض حتى لو كانت مُختلفة. ده سبب إني اِهْتَمِّيت بالدبلوماسية الشعبية أكتر من أي حاجة طول الفترة اللي فاتت.
وأكد السفير هونج جين ، أن مصر بلد جميلة وليها تاريخ عريق ومستقبلها هيكون مشرق. مصر دولة متقدمة و مستقبلها سيكون بَاهِر عشان عندها شباب ذكي زيكوا. وأظن إن مصر هتكون واحدة من الدِول الموجودة في مجموعة العشرين قبل سنة 2050.
وأضاف ، زي ما بيقولوا إن اللي يشرب من نيلها لازم يرجع لها تاني، فأنا مُتَأكِّد إني هرجع لمصر تاني قريب. ومتأكد إن مصر هتكون أحسن وأجمل لما أرجعلها.
وتابع هونج جين ، أنا حزين عشان هسيب مصر لكن عارف إن السفير اللي هيجي بعدي هيحب مصر وشعبها. وأتنمى أنكم تِفْضَلوا تحبوا كوريا وإن العلاقات بين مصر وكوريا تتحسن أكتر وأكتر. متابعاً أتمنى إنكم تفضلوا بصِحَّة وسَلامَة وإن شاء الله أشوفكم قريب شكرا لكم.