الحب على طريقة تشرشل

سيكولوجى

بيحبنى ما بيحبنيش.. بيحبنى مابيحبنيش.. فى بعض الأحيان، بتحس وكأنك بتتعلق بقشاية وانت بتحاول تفك شفرة إذا كان شخص معين بيحبك ولا لأ، خلينى اريحك واقولك انه ممكن يكون من الصعب اكتشاف المشاعر الحقيقية اللى بيكنهالك شخص معين، لكن فى بعض الإشارات اللى ممكن توصلك لزتونة الموضوع، وسواء كانت مشاعره دى رومانسية أم مجرد مشاعر عادية، العلامات اللى هاقولك عليها هاتدلك هل الشخص ده بيحبك ولا لأ، حتى لو كنت انت شخصياً مش واخد بالك.
الشخص اللى بيحبك هيحاول دايماً يكون موجود معاك فى نفس الأماكن، طيب ما هو ممكن يكون معاك ناس كتير ايه الفرق؟، المعروف أن الناس بيحاولوا يقربوا جسديًا من الأشخاص اللى بيحبوهم سواء عن طريق تحريك الحاجات اللى بتفصل بينكم، طبق مثلاً أو مسند كنبه، أو انه يمشى فى نفس الطريق بتاعك ويعدى من جنبك، فلو لاحظت ان فى حد بيعمل كده معاك ، ركز معاه وخد بالك منه بقى وهو ماشى معاك لأن الشخص اللى بيحبك هايمشى دايماً بنفس ايقاع خطوتك ، كمان وهو بيكلمك ، هتلاقيه بيميل براسه ناحيتك ،بيرمش أقل وهو بيسمعك ومركز معاك جدا ،لأن الرمش الكتير دليل على التوتر وهو طبعا معاك حاسس أنه مبسوط وسعيد وزى الفل.
بعد ما خلاص عرفت انه بيحبك،خلى بالك قوى من توابع الانتصار،وزى ماقال ونستون تشرشل وهو بينفخ دخان السيجار وباصص للسقف بعد ما ولاد الحلال بلغوه ان بريطانيا انتصرت فى الحرب العالمية التانية : وماذا بعد؟ ، علشان الحب ده يستمر لازم تفهم اللى قدامك وتبدأ انت وهو فى بناء رصيد متبادل من العلاقات الانسانية ، الرصيد ده هو اللى هاتسحب منه بعد كده مع أول صدام هايحصل بينكم ،لكن قبل ده كله فى حاجة مهمة جداً نسيت اقولك عليها،انه علشان تقدر تحب حد لازم فى الأول تعرف تحب نفسك ، لازم تفهمها وتتصالح معاها ، تقبلها زى ماهى ،من حقك طبعا تحاول تكون أفضل لكن من غير ماتقسو عليها وتجلدها ، وخليك على يقين انك لو ماعرفتش تحب نفسك يبقى عمرك ماهاتعرف تحب أى حد.