«أنا حالف هدبحك».. تفاصيل محاولة قتل زوج لزوجته بسبب قضية نفقة

كشفت "هبة" ضحية محاولة قتل من قبل زوجها، عن تفاصيل الواقعة، مشيرة إلى أن زوجها طلقها بسبب أولادها المصابين بأمراض ولدوا بها، مؤكدا أن لديهم غدة درقية وكهرباء زائدة وفرط شديد في الحركة.
وأضافت "هبة" أن أهل زوجها حاولوا الاعتداء عليها وقتلها أكثر من مرة، قائلة ل"صدى البلد": "زوجي طلقني بسبب أن أولادي اتولودا بغدة درقية، وكهرباء زيادة وفرط شديد في الحركة وكنت بروح الشغل وأرجع أشوف أولادي وأشوف علاجهم وبقالي 6 سنين على هذا الحال".
وتابعت: "أهله حاولوا يموتوني أكتر من مرة، وفي مرة كنت أحتاج الحصول على أشياء خاصة بي أغلقوا عليّ البوابة واعتدوا عليّ بالضرب".
وعن قيامها برفع قضية نفقة على زوجها قالت: "حاول يدبحني ويتخلص مني عندما حاولت رفع قضية نفقة"، مضيفة "كان بيضربني قدام أهله لدرجة أني شوفت الذل معاهم، وكانوا بيضغطوا عليّ علشان اتنازل عن القضية، لدرجة أنهم خطفوا عيالي 6 مرات ورجعتهم تاني".
وقالت: "عاملة 100 محضر ضدهم في قسم الشرطة، وشقيقه وشقيقته اعتدوا عليّ بالضرب".
وروت محاولة ذبحها على يد زوجها، قائلة: "كنت راجعة من الشغل بالليل، وحاول يقتلني.. أخوه كان بيراقب له المكان وهو اعتدى علي وأصابني بجروح بآلة حادة، وكل اللي على لسانه والله لأدبحك.. أنا حالف هدبحك".
واستطردت: "يوم ما كان بيحاول يدبحني اخته وأخوه كانوا واقفين بيتفرجوا عليا وأنا بتدبح.. ولولا جارتي كان زمانه دبحني"، متابعة: "شرَّح دماغي ووشي وكان هيدبحني، ودكتور الجراحة خيطلي 65 غرزة من جوه و65 غرزة من بره"، مؤكدة: "عمل فيا كده علشان رفعت دعوى نفقة لعيالي".
وأوضحت: "بجيب علاج لوجهي ب 2000 جنيه في الأسبوع.. ومش بنام غير بالمسكنات، ليل نهار عايشة على المسكنات"، لافته: "أهله هددونا وكل يوم تهديد.. وأنا عايزاه ياخد أقصى عقوبة هو وأخوه، مش عايزاه يطلع من السجن".
وأشارت: "طليقي مدفعش ولا جنيه في علاج أولادي، وأهلي هما اللي كانوا بيصرفوا عليا وعلى ولادي، ومكنش بيجي معايا للدكاترة".
وأضافت "قولت هربي عيالي وأعالجهم لوحدي أصرف على 2 بدل ما أصرف على 3.. لأن أولادي كانوا مولودين ذوي احتياجات خاصة"، لافته: "زوجي كان بيتشغل باليومية واللي كان بيقبضه كان بيجيب بيه حشيش".
إقرأ أيضاً .. محامية توضح معنى «طلاق الشقاق» | فيديو