«شوقي»عن نصائح معلم لطلاب الثانوية العامة: "افتخر بالعمل معه"

اعرب الدكتور طارق شوقي وزير التربية والتعليم والتعليم الفني، عن إعجابه الشديد بنصائح كتبها معلم يدعى محمد جاد (معلم أول حاسب آلي بمدرسة دشنا الثانوية ومسئول IT وإحصاء ومدير مكتبة يحيي دشنا)، لطلاب الثانوية العامة عبر «فيسبوك».
وقال وزير التربية والتعليم، "سعدت لدقة وعمق نصائح هذا المعلم الفاضل وقررت أن أشارككم إياها، ونشر د.شوقي، عبر حسابه الرسمي على موقع التواصل الاجتماعي «فيسبوك»، نصائح المعلم المذكور لطلابه والتي جاءت نصها كالتالي:
"ابنائي وطلاب وطالبات الثانوية العامة في كلام كده من القلب عايز أقوله ليكم ومعلش ممكن يكون كتير شوية بس ما هو طالع من القلب وملهوش علاقة بأني اتفق أو لا اتفق مع المنظومة الجديدة للتعليم (نظام التابلت).
"أن الغرض الأساسي للمنظومة الجديدة هو قياس نواتج التعلم يعني بالبلدي افهم المعلومة صح وايه أهميتها وازاي اطبقها ومنسهاش مش زي الفترة اللي فاتت اللي يحفظ كويس يجيب مجموع واللي مش عارف يحفظ كويس بينسي حاجات وطبعا المجموع بيقل وفي الاخر ادخل كلية مش عايزها واهو حاجة والسلام ما هو الواحد قرف وتعب والسبب ان كلنا عايزين ندخل علمي علشان ازاي ابقي ادبي فلان دخل علمي هو احسن مني في ايه ومين قال لمعاليك أن الأدبي وحش كل واحد فينا ليه قدرات وذكاء يختلف من فرد للثاني ودي أول غلطة بتغلطها شوف انت نفسك في ايه ومتخليش حد يرسملك طريقك ارسمه بنفسك واجتهد وباذن الله ها توصل لحلمك بس انت اعرف نفسك صح وذاتك صح وحط هدفك قدام عنيك".
"طيب بالنسبة بقي للدوشة والخوف من نظام الامتحان وشكل الأسئلة وهل هو تابلت ولا ورقي وناس عايزة ورقي وناس عايزة تابلت وناس مبقتش فارقة معاها اهو اتعقد وخلاص".
"احب اقولك مش مهم ها تمتحن ازاي أوهاتجاوب ازاي الأهم انت استعديت لشكل الأسئلة الجديدة كويس ودي الحاجة الوحيدة اللي حاليا معروفة ولكن مش عايزين تشوفها أو حتي تقربوا منها - انت عايز السؤال تكون ليه اجابة محددة مش مهم ازاي افكر - ولكن خلاص قضي الأمر ياريت بقي تحاولوا تشوفوا نمط الأسئلة دي وتتدربوا عليها لازم تجتهدوا".
"طيب في نقطة تاني في طلاب كتير فرحت ان الامتحان اوبن بوك طيب يعني انت عايز ايه من الكتاب لما ها تدخل بيه القليل للأسف فاهم أن معني الكتاب معاك يعني انك عارف كويس كل معلومة ممكن ترجعلها عارف مكانها فين وطبعا اكيد السؤال مش ها يكون مباشر ولكن الواقع اللي شايفه وعايشين فيه أن الطلاب عايزة الكتاب علشان تكتب ملاحظات فيه زي ما الوزير ما قال وهنا اسالك الملاحظات دي ها تكون فعلا معلومات بحثت عنها من المصادر المختلفة وحابب تكتبها أم أسئلة من ملخصات تتوقع انها تيجي في الامتحان كما يحدث أو انك ها تصور ملزمة ليلة الامتحان أو أجزاء من الملخصات وتحشرها وسط الورق المصور بتاع الكتاب ده كله تشتيت ليك وها يضيع وقت الامتحان".
"ارجو منكم أن تفوقوا وتجتهدوا وبإذن الله خير ولكل مجتهد نصيب وكل واحد فينا مقسوم له ها يدخل ايه كل اللي عليك اجتهد وذاكر والكلية والمستقبل بيد الله وحده".
"طبعا كلامي مش ها يعجب ناس كتير ولكن دي الحقيقة للاسف، وكمان السنتين اللي فاتو تم اكتشاف أخطاء في أنظمة الامتحانات الإلكترونية سواء عند استخدام الشبكات في المدرسة أو الشريحة أو البيت أو التابلت نفسه لوجود مشاكل في بيت الخط أو بيهنج أو أسباب ترجع للطالب من محاولات لتهكير التابلت مما يوثر على التابلت والحمد لله تم حل معظمها وظهر ذلك في امتحان مايو أن بعض الطلاب يتعمد الخروج من الامتحان أو الدخول بكلمة سر الامتحانات السابقة بالرغم من التوجيهات دائما لكيفية الحصول علي كلمة السر الخاصة بك لإنها سرية ولا يجوز أن يعرفها احد سوي الطالب والامتحان القادم في شهر يونيو وسوف يعلن سيادة الوزير عن الجدول اليوم او غدا الخميس باذن الله و كل ما يتعلق بنظام الامتحان وكل الملاحظات والتساؤلات التي وصلت لمعاليه وخصوصا ان المشكلات كانت فردية وليست جماعية بالإضافة أنه جاري العمل علي تشغيل الشبكة الخاصة بمدرسة دشنا الثانوية وطبعا المفروض الطالب يتعامل بنفسه مع أي مشكلات سواء توجد جلسة بالفعل أو خطأ في اسم المستخدم وكلمة المرور وكيفية الحصول على كلمة السر والاحتفاظ بها وبفرض أن الامتحان اتحول إلى ورقي بردوا مفيش مشكلة لان التابلت هو وسيلة لأداء الامتحان وهو وسيلة للتعلم من المصادر الرسمية التي تحددها الوزارة يعني ها تمتحن ها تمتحن بالنظام الجديد مفيش رجوع".
"باذن الله فترة وها تعدي و يارب الدفعات اللي بعديكوا يكون حظها أحسن ويتم حل تلك المشاكل والمعوقات ولازم العلاج ياخد وقت".
"مع تحياتي / محمد جاد - وانتظروا التعليمات بعد مؤتمر الوزير".
من جهته علق وزير التربية والتعليم والتعليم الفني الدكتور طارق شوقي ، على كل ما كتبه المعلم المذكور عبر «فيسبوك» قائلا ،" إنها حقا نصائح سديدة من معلم مصري أفخر بالعمل معه في منظومة التعليم المصري.. بالتوفيق والنجاح الباهر لكل الطلاب" .
شوقى: الامتحان التجريبي الثالث يدرب طلاب «الثانوية» علي النموذج النهائى