التابلت وسنينه.. كل ما تريد أن تعرفه عن امتحانات الثانوية العامة هذا العام

نشر الكاتب الصحفي أحمد حافظ محرر شئون التعليم أسرار و معلومات عن امتحانات الثانوية العامة هذا العام وذلك عبر صفحته علي موقع الفيس بوك.
وقال حافظ : بالبلدي.. اللي مش فاهم امتحانات الثانوية العامة هتبقى إزاي من لحظة دخول الطالب الامتحان لحد ظهور النتيجة.. يقرأ الكلام ده:
أولا: الامتحان إلكتروني على التابلت بالنسبة للطلبة اللي معاها تابلت فقط.
ثانيا: الامتحان هيبقى ورقي للمنازل والراسبين والباقين للإعادة واللي مدخلوش امتحانات السنة اللي فاتت وطلبة المستشفيات وغيرهم.
ثالثا: الامتحان الإلكتروني هيكون بدون إنترنت.. يعني حضرتك مش هتستخدم الإنترنت في اللجنة خالص.. لا إنترنت الشريحة، ولا إنترنت المدرسة.. مفيش إنترنت خالص.
رابعا: هيبقى إلكتروني من غير إنترنت إزاي؟.. هيبقى يا سيدي من خلال سيرفر المدرسة نفسها.. السيرفر الداخلي للمدرسة.. وده هيبقى في حوالي 2300 مدرسة الوزارة بتقول إن السيرفرات بتاعتها كويسة.
خامسا: هل شرط تمتحن في مدرستك الحكومية اللي انت بتدرس فيها بقالك 3 سنين؟.. الإجابة لأ.. لأنك مش هتمتحن إلا في مدرسة حكومية مجهزة والسيرفرات الداخلية بتاعتها كويسة.
سادسا: معنى كده إن طلبة المدارس الخاصة والقومية مش هيمتحنوا إلكتروني في مدارسهم؟.. الإجابة (أيوة بالظبط كده".. مفيش امتحان إلكتروني هينعقد لطلبة المدارس الخاصة والقومية في مدارسهم.. كله هيمتحن في مدارس حكومية مجهزة والسيرفرات بتاعتها كويسة.
سابعا: طب هل الطالب هيجاوب الامتحان على التابلت؟.. الإجابة لأ.. محدش هيجاوب على التابلت، وكل الطلبة هتجاوب على الأسئلة في ورقة "بابل شيت".. يعني هيبقى السؤال على التابلت لكن الإجابة في ورقة "بابل شيت".
ثامنا: طب بالنسبة للطالب اللي هيمتحن ورقي؟.. هو كمان هيجاوب على الامتحان في "بابل شيت".. يعني هيبقى معاه ورقة أسئلة وورقة تانية "بابل شيت" يحل فيها الامتحان.
تاسعا: إيه البابل شيت ده أصلا؟.. ده ياسيدي ورقة مرقمة بنفس عدد أسئلة الامتحان.. يعني لو الامتحان 50 سؤال هيبقى في البابل شيت 50 مكان للإجابة.. ومكان الإجابة ده هيبقى عبارة عن أربع دوائر.. تظلل على الدائرة الصح حسب السؤال.. بتوضيح أكتر.. لو السؤال رقم خمسة في الامتحان بيقولك مصر كام محافظة – أنا بقول مثلا- ومطلوب منك تختار إجابة واحدة من الاختيارات الأربعة المتاحة.. حضرتك هتروح للبابل شيت وتظلل الدائرة اللي مكان الإجابة الصح.. يعني لو الإجابة الأولى هي الصح تظلل الدائرة الأولى قصاد رقم خمسة.. لو الإجابة التانية هي الصح تظلل الدائرة التانية، وهكذا.
عاشرا: طب البابل شيت ده هيتصحح إزاي؟.. باختصار شديد.. الطالب بعد ما يجاوب المراقبين هيجمعوا البابل شيت والوزارة هتدخل البابل شيت ده في أجهزة ماسحات ضوئية تخرج نتيجة الطالب من الناحية التانية.. وبما إن الأسئلة كلها اختيار من متعدد وكل سؤال له إجابة واحدة صح، إذن الكمبيوتر عارف الإجابة الصح إيه.. علشان كده مش هيكون فيه مجال للتصحيح الخاطئ.. عملت الإجابة الصح هتاخد درجة السؤال عملتها غلط الكمبيوتر هيديك صفر في السؤال ده.
حادي عشر: معنى كده إن التابلت لو عطل أو المنصة وقعت وانت بتمتحن الإجابات مش هتطير؟.. الإجابة لأ.. مش هتطير، لأنك بالأساس من هتجاوب على التابلت.. هتجاوب في ورقة بابل شيت.
ثاني عشر: طب لو التابلت عطل أو المنصة وقعت أو التابلت فصل شحن؟.. هنا احنا بنقول لازم يكون فيه ورق امتحان مطبوع للحالات اللي زي كده.. تقع المنصة أو يحصل حاجة في التابلت.. الطالب يستلم ورقة بالامتحان ويكمل حل الأسئلة في البابل شيت.
- حاولت على قد ما أقدر أشرح ببساطة.. أتمنى تكون المعلومات وصلت بسهولة.
- نلتقي في بوست جديد بمعلومات جديدة.
- ملاحظة مهمة: الناس اللي بتشكك في كلامي، أنا مسئول عن كل كلمة كاتبها وعارف صحتها كويس جدا، فياريت لو حضرتك مش مصدقني انتظر الكلام الرسمي للوزارة، مع العلم إني مستحيل أكتب معلومة كذب على صفحتي.. ده عهد ووعد.. خالص تحياتي.