خراب بيوت.... أونلاين

يوميات الأخبار

سارة الذهبى
مصيبة انتشرت على السوشيال ميديا كنوع من الفضفضة والمشاركة والتنفيس عن الشحنة السلبية اللى جوه الستات بسبب ضغوط الحياة.
(الحقوني... عايزة اتطلق..)
(هحكيلكوا المصيبة اللى أنا فيها وتقولولى أكمّل مع جوزى واللا أسيبه؟)..
(انتى ازاى قاعدة معاه لحد دلوقتي!! انتى معندكيش كرامة يا بنتي؟!)
(طالما سامحتيه مرة والتانية متزعليش من اللى هيعمله فيكى وهترجعى تعيطيلنا وبكرة هتشوفى !!)..
ستات كتير لما هتقرا الكام سطر اللى فوق دول هيعرفوا أنا بتكلم عن ايه من قبل ما اشرح.. فى كارثة بتهدد أسر كتير جداً اسمها جروبات الفضفضة والإعترافات والكونفشنز اللى مغرّقة الفيس بوك وبتلاقى نفسك داخلة فيها من غير ما تطلبى...و فى ستات كتير من باب الفضول بتتابعها وبعدها بتشارك فيها وتدمنها..
مصيبة انتشرت على السوشيال ميديا كنوع من الفضفضة والمشاركة والتنفيس عن الشحنة السلبية اللى جوه الستات بسبب ضغوط الحياة.. بس الأول احقاقاً للحق خلينا نقول ان فى نسبة كبيرة من الجروبات هدفها نبيل اننا ناخد بنصايح بعض فى حاجات تخص المطبخ.. التنضيف... التربية.. تجارب عن المدارس والتمارين وخلافه من الموضوعات المشتركة بين كل الستات.. ولا أنُكر ان أحياناً كنت بلاقيها جابت التايهة وردت على أسئلة كتير بتحيرنى بس علطول بيكون عندى تحّفظ على الستات اللى بتدّى نصايح طبية وهى مش دارسة وساعات بسببهم ستات كتير بتلبس فى الحيط وتحفّظ على الستات اللى بتفتى فى اللى ملهمش فيه على كافة الأصعدة وده متوقع لإننا كستات لو اتسألنا عن الكُفت وقولنا منعرفش ممكن نتحرق!
ده غير حركات الفهلوة والنصاحة والتنظير على بعض لإن طبيعى تلاقى على كل جروب كام واحدة متقمصة دور أبلة حكمت ودايماً كل تصرف مش عاجبها وبتوزع حكم ومواعظ 24 ساعة وعلطول تحسس غيرها بالتقصير وانه غلط من ساسه لراسه... كل ده عادى وممكن يتبلع... والمعلومات المغلوطة الطبية الواحد كان بيصححها على قد ما يقدر وبيحسن النية ان المعلومات دى مش متقالة بهدف الضرر...
كل ده جميل لحد ما ظهرت جروبات متخصصة فى ليفيل تانى خالص... ليفيل الوحش... فضفضة من نوع مرعب ومريب... فضفضة تقدر تهدم أى بيت فى لحظة!
من أول ما تدخلى الجروبات دى مش هتصدقى ازاى أسرار البيوت متبعترة كده بين كذا ألف عضوة...و عادى جداً!
فى ستات جريئة وبتكتب بالأكونت الشخصى بتاعها وده فى نظرى بجاحة مش شجاعة زى ما هما متخيلين... وفى ستات بتبعت مشاكلها للأدمن وهى اللى تنزلها كنوع من الخصوصية وكده، بس الصراحة الست كتّر خيرها بتكون مفصصة كل حاجة بتحصل فى بيتها كإننا عايشين معاها بالظبط... حاجة كده بسم الله ماشاء الله تخرب البيوت بأقل مجهود !! تلاقى اللى بتحكى عن جوزها من أول ما اتخطبوا لحد يومنا هذا وبتنقلك الأحداث اليوم بيومه... واللى تفشى أسرار بيتها وأهل جوزها وتنشر كل غسيلها قدام ناس ولا تعرفهم ولا هما يعرفوها والله أعلم كمان هى بتقول الحقيقة كاملة واللا لأ عشان تقرا كلمتين يطّفوا نارها ويفِشوا غلها!! أيوه الستات دى بتعرّى بيوتها.. بتفضح رجالتها.. مصانتش الأمانة ولا العِشرة....
احنا لو اعتبرنا حتى ان ليكى حق وجوزك مطلّع عينك هل انت مبسوطة وهو بيتهان وبيتشتم بسببك وهو مآمنك على اسمه وبيته وممكن يكون بينكم عيال كمان!!
حتى لو هو غلطان بدل ما تخلّى الموضوع بينك وبينه رايحة تشهّرى بيه... واحنا كلنا عارفين ان الفيس بوك ده أوضة وصالة.. وياما اتسببت الجروبات دى فى طلاق بجد بعد ما الزوج عرف بالصدفة ان مراته خلّت سيرتهم على كل لسان وماشية تندب حظها وتشتكى لطوب الأرض منه وشايفة شتيمته بعنيها وراضية ومبسوطة كمان!! قولولى انتوا بتاخدوا رأى مين وبتفضفضوا لمين؟ لناس لا تعرفيهم ولا يعرفوكي.. لناس ما يعرفوش الا الجزء اللى قررتى تحكيه من الحكاية وبس!
الناس الله أعلم بنفوسهم ونواياهم.. أنا مش هظلم الكل لإن فى ناس بتراعى ربنا وبتنصح بما يُرضى الله بس النسبة الأكبر هما (المشعللاتية) اللى عايزين يجيبوا ضرفها... عايزين جنازة ويشبعوا فيها لطم.. مع انهم ولا يعرفوا صاحبة الحكاية ولا يعرفوا جوزها بس اديها تسلية والسلام... موضوع يقلب الجروب ويشعلل الكومنتات ونضيّع فيه كام ساعة من يومنا واحنا مش حاسين...لعبة جديدة تشغلهم ومسلسل بيتابعوا أحداثه على نار كل ساعة!!
هتلاقى 90٪ من الكومنتات على أى مشكلة مهما كانت تافهة اسطمبة واحدة بس بتتشّكل بكذا طريقة... خلاصتها: (اتطلقي!)
(انتى ازاى قابلة على نفسك كده؟) (ازاى عايشة معاه لحد دلوقتي؟) (انتى اللى وصلّتى نفسك للمرحلة دي.. اشربى بقى!)
يعنى حتى لو الست مطلبتش الطلاق واستهدت بالله خلاص ؛ الكومنتات خلاص شحنتها بكمية عداء وكره ورفض لجوزها بشكل مش طبيعي.. فتبتدى التلاكيك اللى بتؤدى للخناقات ومن بعدها تفكير جاد فى الطلاق أو طلاق فعلي!!
معرفش الستات بيبقى مخها فين لما بتفشى أسرار بيتها وجوزها وتفضح نفسها بالشكل ده!
الكارثة ان ساعات كتير صاحبة المشكلة بتكون متيقنة من جواها انها غلط بس بتفبرك قصة من خيالها أو تكّبر تفاصيل عشان نِفسها تسمع كلام يحسسها بس انها ضحية وانها مغلوبة على أمرها لإن فى ستات كتير بتحب تعيش الدور ده حتى لو مش دورها فتقرر تعيشه مع ناس وهمية لا تعرفهم ولا يعرفوها وولا هيعرفوا يقولوها انتى كذابة أو اتقى ربنا فى اللى بتقوليه!!
وأزيدك من الشعر بيت بقى عشان تتصدمى بجد... انتى عارفة ان معظم اللى بينصحوكى بالطلاق دول لو اتحطوا فى نفس الموقف اللى بتحكيه ده استحالة هيفكروا فى الطلاق واستحالة هياخدوا رأى ناس على جروبات وبيبقوا مكلبشين فى بيوتهم بإيديهم وسنانهم !
الناس دى عارفة كويس أوى ان الكلام على الجروبات حاجة وتطبيقه على أرض الواقع حاجة تانى خالص... هتلاقى نصهم كمان بيتبهدل وراضى وساكت عشان ميخربش بيته بس عاملين فيها سبع البرومبة على النت والجروبات... ما هو عالم وهمى وكله متدارى ورا الشاشات!! شوفتى بقى الازدواجية والخيبة التقيلة!!
وفى بقى اتجاه أكثر دماراً طلع فى المقدر جديد ! جروبات معمولة مخصوص عشان اللى شاكة ان جوزها أو خطيبها بيخونها تنزّل صورته واضحة على الجروب واللى شافته منهم قبل كده تكتب فى الكومنتات عشان تنبه مراته اللى نايمة على ودنها ! واحدة تحط صورة جوزها وتقول انا حاسة انه بيخوننى حد يعرفه هنا على الجروب؟ واتفرج بقى على الاستظراف والاستهتار اللى وصل ان فى ستات بتألّف انها شافت فلان أو متجوزاه وساعات بيرّكبوا الصور فوتوشوب !!و يطلع ده كله كذب!
انتوا متخيلين العقول المريضة والاستخفاف بخراب البيوت وصل لأنهى مرحلة وكام حالة طلاق فعلية حصلت عشان واحدة ست بتهزر وحاطة صورة جوزها وبتسأل لو متجوز واحدة تانية من على الجروب والصورة تقع مثلا فى ايد جوزها أو حد من أصحابه اللى صعبت عليهم فضيحة صاحبهم فبعتوهاله؟!!!!
الجروبات دى وصلّت الأدمنز بتوعها للمحاكم وكانت فى وقت قضية عامة بتناقشها قنوات كتير عشان يحذروا الستات من الاشتراك فى العبث ده! وللأسف الجروبات دى لسه موجودة لوقتنا هذا!
نيجى بقى لنوع تانى من الجروبات على الفيس بوك مبدأها نشر أفكار بطريقة غير سوية وتحريف معناها زى فكرة (السترونج اندبندنت وومن) اللى هو معناها بالنسبالهم؛ أنا ولا يفرق معايا لا بيت ولا جواز ولا عيلة... فليذهب كل ده للجحيم عادى عشان أنا سترونج وهفضل طول عمرى سترونج...
مع انى معرفش ايه الرابط بين انك تكونى قوية وناجحة وليكى شخصية بإنك تهدمى بيتك وتخسرى جوزك وتبهدلى عيالك وتتطلقي!! ربنا مخلقناش عشان نتفشخر اننا (اندبندنت) !!...
خلقنا نميل لتكوين أسرة وعيلة وان الراجل والست يكملوا بعض.. ياما شوفت نماذج كتير لستات فهموا السترونج اندبندنت دى غلط وهدّوا المعبد على اللى فيه وندموا أشد الندم بعد ما خسروا كل حاجة !!
مين اقنع الستات دى ان نجاحهم مش هيكتمل الا لما يتطلقوا وان الزوج لازم هيكره الخير لمراته أو انه يشوفها بتتقدّم خطوة لقدام؟... ليه فى ستات بكلامها بتشجع على الدمار والخراب بدل المودة والرحمة؟!
خدوا حذركم يا ستات... فى جروبات كتير مدسوس فيها السم فى العسل... بتفتكروا انها لتقديم الدعم فا تفضفضوا وتفتحوها على البحَري!
بتتقال فيها نصايح تخرب البيوت وفى آخر البوست تلاقى ايموچى بوسة وقلب قال يعنى خايفين على مصلحتك!!
فى بعض الستات حتى لو نسبتهم قليلة عايزة تخرب حياة غيرها زى ما حياتها اتخربت..عايزة الكل يدوق من نفس الكاس!!!
وفى نسبة كبيرة من الستات بتلّبس ستات غيرها فى الحيط بغشامة لما بتفتى فى موضوع مش عارفين أبعاده لما بيحكموا بعواطفهم ان صاحبة المشكلة صعبت عليهم وتستاهل سيد سيده فلازم تتطلق..
نصيحة لوجه الله لو فى مشكلة لازم تتناقشى فيها مع جوزك مرة واتنين وعشرة.... ولو الدنيا اتسدّت وقررتى ان لازم حد يتدّخل او قررتى تحكى لحد احكى لأم.. لأب... لأخت... لأخ... لإن هما دول أكتر ناس هتخاف عليكى ومش هتظلمك ولا هتظلم جوزك وهيبقوا عايزين يحلّوا مش يخربوا... اتقوا حرمة البيوت لإنها أمانة وعقوبة خاين الأمانة كبيرة أوى عند ربنا..و انتِ أكتر واحدة هتدفعى التمن ! وغالى كمان !