كدابين الزفة .. وإعلام السجادة الزرقاء

شد وجذب

لازم نصدق ان كل واحد فينا بيمثل رقم صحيح في معادلة البناء والتنمية..وكمان لازم نعرف ان احنا مش هنبني بلدنا برفع الاعلام والصور والشتيمة والتظاهر
اللي بيحب مصر بجد يشتغل.. واللي بيحب السيسي بجد يشتغل.. كفاية..تعبنا من المجاملات والطبل والرقص..وكمان تعبنا من كدابين الزفّة اللي كل شوية يخرج علينا مناضل ولا ناشط ولا ثورجي يقولك البلد فيها حاجة غلط ولازم نصلحها.. (النبي تتنيل علي عينك انت وهو وتشوفولكم شغلانه حلال بدل ما انتم عمالين تضحكو علي الناس الغلابة بالوطنية والناصرية والملوخية)....المشكلة دلوقتي في الناس اللي بتحب مصر..الحقيقة ان احنا مش عارفين نترجم حبنا وخوفنا علي البلد لواقع ملموس..الموضوع باختصار اننا دولة في حالة حرب حقيقية ضد الاٍرهاب في سيناء وكل يوم يسقط منا شباب يستشهدون للدفاع عن تراب الوطن..ومع ذلك احنا مش (مسلمين ومش هنسلم).. لا ده احنا بنبني ونعمر وبنعمل مشاريع عملاقة تساعدنا اننا ننتقل بجد من دولة تصارع من اجل البقاء إلي دولة قوية ومستقرة وبتعرف ازاي تستفيد من كل مواردها الطبيعية..بس المورد الأكبر للبلد دي هو الشباب اللي انا مش عارفين لحد دلوقتي هو عاوز ايه..يتكلم عن الحقوق ولما ندي السعودية حقها في الجزر يطّلع يقول باعوا البلد..ولما نعلن عن فرص عمل تلاقي الشباب مش عاوز يشتغل ويقولك يا شغل في الحكومة يا بلاش..طب الحكومة فيها 6 ملايين موظف منهم علي الأقل 5 ملايين عاطل..هو احنا عاوزين نوفر فرص عمل بجد علشان يبقي في انتاج ولا عاوزين نزود عدد العاطلين..كل ما تقعد مع حد يقولك شوفو الشباب عاوزين ايه..طب والنبي هما اللي بيموتو من الجيش والشرطة كل يوم دول مش شباب في عمر الزهور..والاطباء اللي بيشتغلو في المستشفيات والمدرسين والمهندسين والمحاميين والرياضيين دول مش شباب ولا ايه..الواحد مبقاش فاهم أنهي شباب اللي الناس قصداهم نشوفهم عاوزين اية..لو قصدكم علي الشباب اللي بيطلع يتظاهر علشان يهد الدولة يبقي احنا بنصنف شباب مصر غلط..لا..شباب مصر الحقيقي اللي مشغل المصانع واللي بيحارب علشان انا وانت نعيش في أمان واللي بينام في الشارع طول الليل علشان ولادك وولادي يحسوا انهم في بلد بجد..انا كمان عاوز أكلم رجال الاعمال اللي كل شوية واحد يطّلع علينا ينظر في الفضائيات ويقول اصل البلد عاوزه وعاوزه ولما تسأله وانت عملت ايه للبلد يقولك انا عامل مشاريع وبشغل آلاف الشباب وبدفع ضرائب وتأمينات وكله تمام..طب انا عاوز اسأل رجال الاعمال يعني هو الأمان الاجتماعي ده ما لوش ثمن.. ولو انت عندك مليارات وعايش في دولة غير مستقرة مش هتعرف تكسب جنيه..ما اقصده في هذه المرحلة تحديدا اننا كدولة في أشد الحاجة إلي بَعضنَا البعض وان ده مش وقت انا عملت ايه وغيري بيعمل ايه.. ده وقت لازم نتفق كلنا ونقول احنا عاوزين نعمل ايه علشان البلد دي تقوم بجد..مش هينفع نحقق اي حاجة الا لو اشتغلنا كلنا مش لازم زي بعض.. بس لازم نشتغل وننتج علشان ولادنا تلاقي بلد بجد لما يكبروا..لو غيرنا بيخرب احنا لازم نعمر..ولو غيرنا بيهد احنا لازم نبني.. ولو غيرنا بيحرق ويولع احنا لازم نطفي..لما بحب اشوف وضع مصر دلوقتي بركب عجلة الزمن للخلف وافتكر احنا كنّا ازاي من سنتين بس..فاكرين الخطف وسرقة العربيات والسرقة اللي في عز الظهر وحرق السيارات واحتلال الميادين والباعة الجائلين وغيره وغيره..عارفين احنا فين دلوقتي..احنا في قصر الاتحادية بنستقبل الملك سلمان..وفي قصر عابدين بنستقبل رئيس فرنسا..وفي قصر القبة بنستقبل حاكم الإمارات..وفي الأزهر والكاتدرائية بنستقبل ملك البحرين..ولما أقول احنا يبقي الرئيس السيسي لان هو ده الرجل اللي احنا اخترناه..وللحق الراجل لحد دلوقتي ما عملش اي حاجة غير اللي وعد بيها.. بس كمان هو قال ان مصر هتبقي قد الدنيا بينا كلنا مش بيا انا لوحدي.. وعلشان كده انا نفسي الشعب يشتغل علشان كلنا نحس بالتنمية..صدقوني لو ما اشتغلناش هنقعد 100سنة زي ما احنا ومش هنتقدم ونفضل ننتظر الهبات علشان نزود الاحتياطي الأجنبي او ندور علي حد يساعدنا ويدينا منح علشان نطور السكة الحديد والطرق والمدارس..احنا نقدر نعمل حاجات كتير بس لو اشتغلنا..ويسقط كل خائن يدعي أنه ناصري او ناشط سياسي او ثورجي وعاش شباب مصر الأبطال الذين يدفعون ثمن أمان المصريين بدمائهم. بالمناسبة رسالة الرئيس عن السجادة الحمراء والزرقاء موجهة للإعلاميين بتوع الباميه والملوخية اللي ما بيعرفوش يتكلّمو الا في الهايف وبس ومع الأسف الناس بتاخذ العاطل في الباطل يعني اي حد بيقدم صورة سيئة عن الاعلام بيدفع ثمنها الجميع..اتمني إنهاء الأزمة المفتعلة بين نقابة الصحفيين والداخلية وان تستجيب جميع موسسات الدولة لرسالة الرئيس بأننا لسنا في مرحلة تسمح بالاختلاف..وتحيا مصر.