«حدوتة قبل النوم».. «البقرة سمسمة»

لكل أم تجد صعوبة في نوم أطفالها، إليكِ حلا سحريًا للأخذ بيد طفلك إلى عالم الأحلام والنوم الهاديء.. «شيماء عبدالعال» تقدم مجموعة قصص يومية تساعدك على ذلك:
حدوتة النهاردة ... «البقرة سمسمة»
كان ياما كان كان في زمان بقرة اسمها سمسمة، كانت البقرة سمسمة عايشة في مزرعة مع مجموعة من الحيوانات والطيور، البقرة سمسمة كانت كل الحيوانات و الطيور بتحبها ونفسهم يبقوا اصحابها، لكنها كانت مغرورة و مش بتكلم حد فيهم وبتحب تقعد لوحدها من ساعة ما صاحب المزرعة اشتراها وجابها المزرعة وخصص لها مكان تنام فيه وهي مش بتكلم باقي الحيوانات.
في الأول الحيوانات افتكروها خايفة عشان غريبة عنهم ولسه جديدة في المزرعة و حاولوا كتير يتقربوا منها و تبقي صاحبتهم، طلبوا منها كتير تلعب معاهم لكنها كانت بترفض وتبصلهم وتسيبهم وتمشي وفي مرة قرب منها الارنب فوفو و سألها انتي ايه حكايتك بقي؟ هو احنا زعلناكي في حاجه، انتي مش بتكلمينا ليه، قالتلوا وانا اتكلم معاكوا ليه، انتوا مش زييا انا بقرة لكن انتوا مش بقر زي و انا اكتر واحدة مفيدة فيكوا في المزرعه واكتر واحدة بشتغل فيكوا، انا بساعد صاحب المزرعه في زراعه الارض بتاعته و بياخد مني اللبن بيبيعوه وبيعمل منه الزبدة والجبنة وبيكسب فلوس كتير، لكن انت بقي يا ارنب فوفو بتعمل ايه وايه اللي بيكسبوا صاحب المزرعه من وراك قالها انا بعرف اعمل حاجات كتير قالتلوا بس برضه مش زي انا وسابيته ومشيت وهي ماشية بسرعه اتكعبلت في حبل مرمي علي الارض ومن غرورها مرضيتش تبص تحتها ورفعت راسها لفوق و كملت مشي الحبل اتعقد في رجلها ووقعت علي الارض والواقعه كانت جامدة اووووي و دمغها اتخبطت في الارض.
الارنب فوفو جري بسرعه عليها عشان يطمن عليها و يعرف جرالها ايه لقي الحبل معقود في رجليها و لازم يتقطع، الارنب قرب من وش البقرة سمسمه و قالها متخافيش بسيطة ان شاء الله الحبل بس اتعقد في رجلك و اتربط فمحتاج يتقطع بحاجه، بس متقلقيش انا اقدر اساعدك انا هروح انده صاحب المزرعه يجيب مقص و يقص الحبل، قالتلوا بس صاحب المزرعه مش موجود ده خرج وهيرجع بكرة الصبح، يعني هفضل كدة لحد الصبح ، قالها طيب خلاص انا جاتلي فكرة انا اسناني قوية و حامية زي السكينة ممكن اقرقض الحبل باسناني واقطعه وافكك من الحبل وبالفعل بدأ الارنب فوفو يقطع الحبل باسنانه لحد ما فك البقرة سمسمه واتجمعت باقي الحيوانات وفضلوا يسندوها ويساعدوها لحد ما وقفت علي رجلها.
فرحت جدا البقرة سمسمه وشكرتهم وكانت مكسوفه جدا من نفسها عشان غرورها خلاها تبعد عن باقي الحيوانات وتفتكر نفسها أحسن منهم، ومكنتش تعرف أن كل حيوان في المزرعة له دور و وظيفه مش لازم كلنا نكون زي بعض وان لولا مساعدة الارنب فوفو وباقي الحيوانات اللي في المزرعه مكنتش عرفت تفك الحبل من رجلها ومن ساعتها بقت البقرة سمسمة بتحب كل الحيوانات و هما كمان بيحبوها و بقوا اصحاب جدا.