رسالة إلى سيادة الرئيس

يا سلام
وأنت واقف في الميدان
قلت كلام
يا سلام على الكلام
فكرني بخير زمان
ساعتها أتحسست بطني
قلت وداعا يا حرمان
خلاص مش هبات ليلة
جعان
حسيت إنك واحد مننا
دقت المر زينا
بتتمنى لينا أيام سعيدة
نعيشها في هَنَا
في المرتب.. في المعاش
اللي بيودع جيوبي
لنص الشهر ما يستناش
في العلاج
اللي ما أصبحشي سياج
دا المرض بقى علينا سهل
من علاج
حول الشاب لكهل
***
يا سلام
وأنت بتقول الكلام
عن الأمن والأمان
حلمت وأنا صاحي
أنى هأرجع تأنى من تعبي
من غير خوف أنام
قلت خلاص مفيش خوف
كمان مفيش طوابير
مفيش وقوف
خلاص هتنتهي زحمة الصفوف
وهستغل كل وقتي في العمل
مع آلتي اللي وحشتني
مفيش كسل
***
يا سلام
على الكلام
لما يتحول لعمل
والنفوس تبقى راضية
من غير كلل
العرق أحسن علاج للملل
لا أبدا مش هيبقى فيه ملل
التصدير هيبقى هو البطل
***
يا سلام
على الكلام
منه حسيت أنى بقيت
في بلدي سيد
والقرار نابع مننا
في حب مصر من غير تردد
شفت في كلامك
نسايم الحرية
حسيت من تصريحاتك
أسمى معاني الوطنية
كان كلامك
أمل وردى خارج فوق لسانك
كنت فارس
وعدتنا للمحروسة حارس
كان لسانك
خيال فوق حصانك
اللي بيه هتحقق
ميزان عدالة اجتماعية
***
يا سلام
على الكلام
بصراحة حسيت
بكرامتي المصرية
رجعتلي تانى الغالية هوية
حسيت أنى تاني
لبست تاج طار بروحي
فوق السحاب
وأعلى كمان شوية
الكلام
كان كتير
كان كبير
***
يا سلام
على الكلام
لما يتحول بصدق
لما يحضن الفكر السلوك
والسلوك يبقى للفكر عمل
يبقى للإنتاج صكوك
نفسي أشوف منك جواب
تبنى جيل بتعاليم الكتاب
***
يا سلام
على الكلام
لما يترجم الأمل بالعمل
وننسج من خيوط الشمس
مستقبل مصر
ويزول الغمام
ساعتها هحس
إنه كان مش كلام
كان خطة أمل
وأتحول الكلام لعمل
وأنت لك مننا
على صدق الكلام
تعظيم سلام