ثرثرة إخوانية على طريق الإسماعيلية

2012- م 08:07:14 الخميس 29 - مارس
عندما تعطل أتوبيس مدرسة إبنتي نور الواقعة بوسط الصحراء فى طريق الإسماعيلية بسبب نقص الوقود أصيب الجميع بالهلع إلا المستر الإخواني الذي استغل الفرصة ليقوم بعملية غسيل مخ للموجودين.
المستر الاخواني: عارفين يا جماعة ان الاشتراكية والرأسمالية دول ليبرالية يعني حرام والعياذ بالله وضد الاسلام
نور: ازاي الكلام ده أنا ليبرالية ( طالعة لي) وبصلي وبصوم
المستر الاخواني: بتصلي بس مش بتخدمي الاسلام بس إحنا بنخدم الاسلام
نور: طب وخدمة الوطن فين بقى؟
المستر الاخواني: لابد من خدمة الاسلام قبل اي حاجة يعني عارفة المخلوع مبارك كان بيخدم الأمريكان لكن إحنا عمرنا ما هنعمل اي معاهدات معاهم
نور: معقولة مش هتعملوا معاهدات خالص
المسترالاخواني: ايوة الا لو كانت معاهدات في خدمة الاسلام ..ودق محمول المستر الاخواني.
المستر الاخواني: نعم يا مولانا لقد نفد وقود الحافلة ولكنني سآتي في المساء
نور تقول لنفسها ( ليه بيتكلم كده زي بتوع قريش) واتصلت احدى المدرسات بالجيش لانقاذ الموقف
وواصل المدرس الاخواني: فيه اللي بيحاول يشوه صورتنا لكننا نحمل الخير لمصر
وصرخ عم شعبان السائق: يا جماعة الباص واقف ومش عارفين نروح بيوتنا وانتم بتتكلموا في السياسة ووصل الوقود من الجيش لانقاذ الباص من الصحراء وغسيل المخ.. يا رب دائماً يكون الجيش على هذا المنوال.