الشاعرة الشابة سارة سمير تكتب قصيدة "شبرا"

ألقت الشاعرة الشابة سارة سمير مجموعة من قصائدها أمام العديد من جمهور ساقية الصاوي وقالت إن مثلها الأعلى في الشعر هو الشاعر الكبير سالم الشهباني والقصيدة هي :
يا أم الغنا .. والجدعنة
والوحدة ...والنخوة
طب أسية ليه
عليا أنا..
بسأل يا شبرا
ده أنا دمعي سال فيكي
بقي كورنيش
ياما اتباهيت بيكي
ما تنكرنبيش
وسكنت حواريكي
وداسوني قبليكي
وسهرت أناديكي
ما لبيتيش
طول عمري ليكي كتاب
حافظ تاريخك
ناسك ..وأهلك ..
والي فيكي مغترب
حارتك .. وشارعك
وأسألي في وصفة طبيخك
خناقات وشوم
رامية الهموم في كل حتة
من سب دين
من واد لعين لأبوة في ناحية
لبيوت قبور
سكناها يمكن ألف جثة
عالية العماير
بس تحت الأرض لسا
أهين.. وأه .. وآلتالته آه منك ياشبرا
في قلب بيت واحد
ظابط وعربجي
دكتور وابويا
وأنا إلي بنت البصمجي
وبنات بميت مله
من طاهرة علي فاجرة
ودروبها متاخرة
.... وأخفي ياشبرا
في دخلتك مملكة
والمانيكانات متشيكة
وولا .. بنات .. والأيادي مشبكة
علي مترو شبرا
زحام
.. لحام
.. وأجمل حزام
، والنضارات.. والترحة سترة
ودخلة فيها
وجلجلي
سيدي علي -مولد-
وحي حي
دخلو المقام
بيقولو حي
نابت يافول
زي الدهب
والملك لخليفتة أتوهب
والصيدلي
لعن الخرافة
وجاب درافها
وحلف ما يفتح
إلا الاسبوع إلي جي
وناس مسافرة وجاية بابها
تقولش بيزورو الحسين
وهي ناسها واخدة جنب
الرقصات والحشاشين
فاكرينها رابعة
.. وهي شبرا
اغاخان
يا حلم عمري
ندرن عليا لو سكنتك
أدبحلي عجل ف كل جمعة
دة البصة من شباك عمارتك
ع النيل تطير ألف دمعة
يا روضة النيل -جنينه-
يا أرض اللقي
واخدة من روض الفرج
ومشرّقة
والحب فيكي مغرقة
ياروضة النيل
يا متنغم بدقاتها
يامصلي ف سانت تريز
يا أبو ماري
يا أبا جرجس
دة صوت المأدنة العالي
دة حاجة تغيظ
ويلا أهو كله للمرضي
ومجد دة منا وعلينا
صاحبة إلي اسمة
شيخ رمضان
أهو لامم أهالينا
أنا استعجب لفكتوريا
دي سايبة بلدها جايلنا
بتعمل أية في أراضينا
يا ترعتها
بقالي زمان
مابشوفلكيش ميه
يا ترميها
بقيت أسفلت
تدوسة الرايحة
والجاية
وأنا بلالي
واجز سناني .. يافلوسي
ياريتني مافت في خلوصي
دي مش أسعار
ده خرب بيوت
وفال نازل خصوم كبري
جزاء ليا أزور
عبود علي رجلي
ولا أدخلشي. شارع شبرا
ولا حلمي يوديني
ولا عايدة تكون كافية
ولا انكبش علي عيني
بعيد عن بيت أبو وافية
وان وافية قالت سافر
ها أشد وأمد في الآخر
ما أهي كلها شبرا
علي إد ما حفظت المباني
لسا حاير في القلوب
دي طيبة ولا
خيبة ولا مريسة
دة إلي ما رحش المدرسه
يفك ميت مكتوب
وناسها عادي كويسه
بس منها ألف حازر
دة البيوت فيها
بمعادن مش بطوب
لا الثورة فيها أثرت
ولا رممت شقين في بيت
منها الحرامي والشهيد
والغني كمّل غناه
والفقير كمّل عبيط
واهي لسا شبرا
بس بأمانة ليها روح
ماتشفها ف الدنيا في مكان
معلمين
وفنانين
وليل حصان
تحس انك جوة بيتك
حتي لو نطقك جريجي
ولو لمحتها ماشية صدفة
قبل ماتروّح
بتيجي
ألف رحمه عليك ياجدي
رياض ياحتة سكره
بس ماتزعلش مني
لسا شبرا منورة
مين إلي قالك شفت مصر
لو ماكنتش شفت شبرا
عيلة
وأصول
مش مجرد حتة من بنت المعز
علي أد ماتشرف
.. تعرّ !
يعني جايز وصفها بأي لفظ
وماتزعليش مني دة أنا
كاهن ف دينك
أنا مش بهينك
أنا عارفه انك بنت حلوة
قلبها حب البسيط
مضحوك عليكي
مفروض عليكي
وأية بأديكي
إلا زي إلي بأديا
تصبري
ما أنا لسا صابرة
وقلبي لية ... حبك ياشبرا. "