نشطاء "تويتر": موافقون على 8جنيه بشرط الوزير يقبض 240جنيه"

تسبب تصريح وزير التخطيط أشرف العربي بأن المصري يكفيه 8 جنيهات كنفقات يومية، في اشتعال موقع التواصل الاجتماعي "تويتر" بالتعليقات الساخنة الغاضبة.
وقال إبراهيم عيسى "وزير تخطيط مبارك قال المصري يكفيه 6 جنيهات في اليوم، ووزير تخطيط المرشد بيقول المصري يكفيه 8 جنيه يعنى الثورة قامت علشان 2 جنيه زيادة".
وأضافت شيرين "وزير التخطيط الحالي يؤكد أن 8 جنيه مصري تكفي المواطن يوميا !! .. أعتقد أن الشعب يعلن موافقته إذا كان راتب الوزير ورئيسه 240 جنيه شهريا" !
وذكر مصري "أنا بطالب أن مرتب وزير التخطيط يكون 8 جنيه يوميا ، يعني 240 جنيه في الشهر بس ويورينا ازاي هيعيش ".
وقالت روان: "هتتعشى ببيضة ورغيف ب 1.5 جنية هتشتري كارت شحن ب 1.5 جنية هتروح بأتوبيس ب0.5 جنية يبقى كدا المجموع كله 8 جنيه انتو هتنهبوا ولا هتنهبوا!!".
وأضافت نانو: "انتى بتنفقى اكتر من 8 جنيه فى اليوم! !فعلا إنتى رأسمالية، إمبريالية، شيوعية، إشتراكية، ربنا يسامحك بقى".
وقال تامر " يكمل عليهم كمان 8 جنيه وبيشرب بيهم شاى إنجليزى ف كومبانى كافيه".
ووجه نور الدين سؤالا للوزير قائلا: "سؤال للوزير أبو 8 جنيه دة أنت ممكن تاخد 10 جنيه فاليوم بلاش 8 جنيه و تنقطنة بسكاتك و تترك الوزارة دي لحد عاش فالبلد دي قبل كدة".
وقال أحمد "أيوا على فكرة المواطن كفاية عليه 8 جنيه ف اليوم ... 2 جنيه ترايدنت و3 جنيه سجاير فرط و يركب بالباقي مكروباصات ملهاش لازمة التاكسيات والفشخرة".

أما أمنية فقالت "و النبي محدش يقول لابويا حوار إن الإنسان ممكن يعيش ب 8 جنيه في اليوم لحسن يصدق".