فزورة

فزورة »عبيطة«.. لما يكون فيه اتنين نشالين في أتوبيس بيمارسوا هوايتهم في جيوب الخلق.. ليه »المخبر« قفش واحد.. وساب الثاني »ينط«.. هل لأن النشال »الثاني« قريب »المخبر«.. أم ان النشال ده له ضهر في القسم ولا أقول لك خلينا نفترض حسن النية ونقول إن المخبر كان »ناوي« يقفش الجوز.. إلا أن »جلابيته« كانت »ضيقة« فلم تمكنه من »اللحاق« بالنشال اللي نط.. فاكتفي بالأول.
الفزورة محدش حيعرف يحلها.. لأنها حقيقة.. وحصلت كمان.. حتي اسألوا الحكومة ليه »فضحت وجرست« أعضاء مجلسي الشعب والشوري وخلّتهم ماشيين وسط الناس زي اللي سارقين »وزة«.. في حين انها »سابت« وماجابتش سيرت ناس تانية.. عملت زيهم وأنيل في »قرارات« العلاج علي نفقة الدولة.. يا راجل ده فيه ناس عادية »زيي وزيك« سفروهم للعلاج علي إنهم وزرا.. وناس مالهاش تتعالج.. اتعالجت وواحد كان عاوز يحشي ضرس سفروه »أمريكا«، وده مش »كلامي« ولا كلام الكمساري ده كلام »مكتوب« ومتوثق في كل التقارير الرقابية اللي اتعملت علي الموضوع ده.. والحكومة أول من »قرته« بالتفصيل.. فهل من جاء ذكرهم بالتقرير من غير أعضاء »المجلسين«-النشال التاني اللي نط- علي رأسهم »ريشة« والباقي- النشال الاول أعضاء المجلس- علي رأسهم »بطحة«، وماينفعش »يتساوي« أبو ريشة مع أبو بطحة في سرقة فلوس البلد..، ولا احنا مالناش دعوة والموضوع مايخصناش.. طالما ان مسئولين في الحكومة هما اللي سرقوا الحكومة.. عملاً بمقولة »جوزي وأنا حرة فيه« أفرده ولا أتنيه.

طيب.. افرض ان التحقيقات أثبتت ان فيه سرقة حصلت في قرارات العلاج، وتم القبض علي كام واحد متورطين في الموضوع.. ماذا سيعود علي المواطنين من ذلك.. هل تحسنت الخدمة الصحية المقدمة لهم.. هل »بطلوا« يشتكوا من معاناتهم في المستشفيات.. اقطع دراعي؟!!.