دلوقتي مفيش ست ولا راجل فيكي يا مصر مش بيرقص في فرح في حفلة في شارع، في لجنة حتي في المواصلات ساعات تلاقي ناس بترقص علي روحها ينتابني شعور خفي بالقلق كلما رن موبايلي ووجدت علي الشاشة عبارة «رقم خاص» وهو ما يعني أن واحد من علية القوم يطلب العبد الفقير ولأن علية القوم غالبا لا يأتي منهم إلا الشر فيكاد قلبي ينخلع في الثواني التي استغرقها قبل أن أرد علي المتصل الذي يتضح في النهاية أنه لا من علية القوم ولا حاجة ولكنه غالبا ما يكون صديق من إللي ربنا فرجها عليه بقرشين وعمل خاصية الرقم الخاص. - المهم أنني عندما فتحت الخط علي المتصل هذه المرة لم يكن من الأصوات المألوفة عندي ودار بيني وبينه هذا الحوار: - صباح الخير يا اتش. - أهلا وسهلا مين معايا؟ - أنا أفلاطون ياجدع مش عارفني؟ - يافتاح ياعليم يارزاق ياكريم انت اسمك يعني أفلاطون ولا إيه؟ - أنا اسمي الحقيقي آرستيوكليس بس بيدلعوني يقولولي أفلاطون ولو الاسم تقيل عليك تقدر تختارلي انت أي اسم دلع وتناديني بيه؟ - غريبة أوي عايز تفهمني أنك الفيلسوف الكبير أفلاطون، طيب بتتكلم منين وجبت رقمي ازاي؟ - بلاش الأسئلة إللي ملهاش لازمة دي يا جدع وقولي أخبار الحاج أحمد مبارك والست الوالدة عاملين إيه؟ - بخير الحمد لله هو انت كمان عارف أبويا وامي يا «أفا»؟. - أفا؟ ايه الدلع الغريب ده؟ - اختصار افلاطون وبعدين يا سيدي ماله القفا؟ ده رمز من رموز الانسان المصري المعاصر وياما اتعملت عليه أعمال فنية وأغاني كمان كسرت الدنيا. - أيوه صحيح بمناسبة الأعمال الفنية أنا زعلان منكم جدا يا مصريين. - ليه بس كفي الله الشر زعلناك في إيه؟ بقي يا راجل ما سمعتوش الحكمة اللي أنا قلتها مرة «علموا أولادكم الفنون ثم أغلقوا السجون؟» - سمعناها طبعا وعملنا بيها والحمد لله دلوقتي مفيش ست ولا راجل فيكي يا مصر مش بيرقص في فرح في حفلة في شارع، في لجنة حتي في المواصلات ساعات تلاقي ناس بترقص علي روحها. - وهو ده برضه يا راجل الفن اللي أنا اقصده؟ الفن يا اتش، الفن يا راجل اللي بعد ما ينتشر في البلد يخليكم مش محتاجين سجون تاني! - أهو ده بقي اللي موجود عندنا يا «أفا» عاجبك ولا مش عاجبك؟ - فن هابط يا اتش متزعلش مني وعلشان كده السجون عندكم سمعت انها مليانة شباب! - سجون إيه ومعتقلات إيه يا جدع انت الموبايلات ليها ودان هو انت غيرت نشاطك من الفلسفة لحقوق الانسان ولا تكونش بقيت من الإخوان ولا إيه خليك في حالك اعمل معروف ويا ريت تمسح رقمي من عندك وكفاية إنك كل يوم عاملي مشاكل مع مراتي! - أنا؟ مشاكل مع مراتك؟ ما لها الست الأميرة دي اللي مستحملاك طول العمر ده؟ كل يوم تقولي إنها اتصدمت فيا لأني محبتهاش حب أفلاطوني من اللي كانت بتحلم بيه، روح يا شيخ الله يخرب بيتك - يخرب بيتي؟ ليه كده بس يا إتش معقولة هي دي لغتكم في الإعلام؟ - لا بقي ده لو عايز تسمع من المنقي خيار أنا عازمك النهاردة علي شوية برامج توك شو من اللي قلبك يحبها ساعتها هتعرف اني لما اقولك يخرب بيتك يبقي مجرد هزار يا«أفا». - عموما ده نتيجة طبيعية للفن اللي موجود عندكم دلوقتي ده أنا اتفرجت صدفة علي إعلانات الأفلام الجديدة في مصر اتصدمت جدا! - ياعم اقفل الخط بقي ومتوجعش قلبي معاك. - هاقفل يا اتش بس سؤال أخير معلش قبل ماسيبك. - اللهم طولك يا روح هاه اسأل يا عم الأفا وخلصني؟ - إلا ما تعرفش يا إتش صافيناز الرقاصة مرتبطة ولا لسه سينجل؟
