عاجل جدا

تابعناها بانبهار في حواراتها الممتعة مع كبار الاعلاميين.. تفوقت علي كبار المثقفين والسياسيين-رغم انها لا تقرأ ولاتكتب- في تحليل اخطاء عهد مرسي وشرح احوال مصر ومشاكل شعبها واخطاء حكومتها.. هي"ام اشرف" المصرية البسيطة التي صفعها اخواني علي وجهها يوم محاكمة مرسي لأنها وقفت امام المحكمة تحمل صورة السيسي وتهتف له. اصبحت ام اشرف حديث كل بيت بعد ان ذكرتنا بالمصري الاصيل الذي افتقدناه بوعيه الفطري وقناعته وعزة نفسه رغم ظروفه الطاحنة. قالت ام اشرف:"شرعية ايه اللي بيتكلم عنها مرسي بعد ما جاب البلطجية وبتوع حماس يهتفوا ضد الجيش والشعب ويقتلوا ولادنا في سينا.. ويفجروا الأقسام.. ويسمحوا لأمريكا وتركيا يتدخلوا في حياتنا. مفيش مصالحة.. انتوا قتلتوا ولادنا.. وفي الصعيد عندنا لازم ناخد تارنا م الكبير.. يعني لازم نحاكم مرسي. ده كان عايز يبيع القناة لقطر وحلايب وشلاتين للسودان وسينا لحماس عشان يوسع لاسرائيل.. ده قعد سنة واحدة.. فرق الشعب المصري وخلاه يحارب ويقتل بعضه. مبارك ماعملهاش في 30 سنة.. لكن الحمد لله جيشنا والسيسي انقذوا البلد. الحكومة دي لازم تمشي دي مش حاسة بالشعب خالص.. كلام وكدب في التليفزيون وفعل مفيش.احنا في شبرا الخيمة معجونين.. من يوم العيد ما شفناش اللحمة.. وعايشين علي رجول الفراخ.. ايجار الميه والكهربا أغلي من ايجار الشقة.. الزبالة ومية المجاري مغرقة السرنجة.وختمت ام اشرف بحكمة بليغة:"طول ما الناس دي مش حاسة بينا مش هنقف جنبهم". أتمني ان يدرك حكمة ام اشرف كل من يفكر في حكم مصر.. اذا أراد ان يحمي نفسه من مصير مبارك ومرسي.