طريق النور

ياعم أوباما.. متشكرين

يا أوباما يا مسكين.. حلمك في الشرق الاوسط الكبير دمره ولاد مصر في ثورتين اتنين.. وحبايبك اللي اسمهم اخوان مسلمين.. طلعوا فشنك والفشل عنوانهم.. وفكرهم اضيق من فكر المجرمين.. وان كان ع المعونة اللي نازل تهديد بيها.. بنقولك متشكرين.. مش عايزين.. دي الكرامة عندنا اكبر واعظم من اموالك اللي معجونة بالذل والقهر ومتغمسة بالطين.
لكن يا أخ اوباما.. قبل ما تفكر وتقطع معونتك.. تعالي نتحاسب ونعرف من اللي كسبان فينا.. واوعي تنسي انها مربوطة باتفاقية سلام مع حبيبة القلب اسرائيل اللي بتحميها بنور العين.. وبتدافع عنها شمال ويمين وخارب بلاد العرب.. والربيع صبح خريف ورعد وشتا علي كل المسلمين.
واذا كان اللي سبقك فلح.. ودمر العراق وشرد الملايين.. وفي الاخر نال من اللعنات الكتير.. وح يفضل دم اللي ماتوا في رقبته لحد يوم الدين.. وبحق هذا اليوم الكريم عند رب العزة الحليم.. يوم عيد الاضحي.. بكرة عليك الدور.. ووكستك ح تكون اكبر من ابن بوش اللعين.. ونروح بعيد ليه ما كفايه ان بوتين علمك درس السنين.. وحرمك تقرب من سوريا.. والاسد وراه غير روسيا وايران.. الصين اللي قالت عليك انك اكبر ندل في العالم.. وانك خسيس ولا عندك مروءة ولا حتي أمين.
يا عم اوباما عيب.. لسه مصر فيها ناس رجالة.. وحافظة العهود من عشرات السنين.. وبكرة ح يعلموك درس العمر.. ويقولك طظ في معونتك وبنقولك باسم الشعب متشكرين.. متشكرين.. متشكرين.
وان كانت ثورتنا المجيدة.. حررتنا ونورت سكتنا.. وعرفتنا مين معانا.. ومين علينا.. وكشفت أوراق اللعبة اللعينة.. وان اوباما راعي الارهاب في كل شبر في العالم.. وفي كل حته من اراضينا.. وان كلامه عن الديمقراطية والحرية وحماية الاقلية والمرأة والطفل والكهل كله كذب في كذب.. وبكره ندوسه برجلينا.. ويكفي ان باترسون ورجالته فشلوا في مخططهم.. وضاعت احلامهم وجروا الخيبة قدامهم.. وقالوا لروحهم روحنا نتفاوض ونقايض ونديهم من عندنا الفايض.. لكننا فقدنا الامل وروحنا زي ما جينا.. والاخوان اللي كانوا سامعين كلامنا ومنفذين كل حرف اهم راحو في خبر كان.. ومفيش غير اننا نغير حساباتنا.. ونربي فصيل تاني يحقق لينا احلامنا.
وعلينا قبل ما يفوق اوباما واعوانه.. كل واحد مننا يعمل اللي عليه ويبص قدامه.. ياما أمم زينا شافت فقر وضنا.. لكنها بالعمل والعرق زرعت في نفوس اولادها الامل واعتمدت علي نفسها.. وحصدت الورد في اوانه.. وان كان المسئولين عننا خايفين.. بنقولهم من دلوقتي احنا معاكم.. مشروع كبير يلمنا ويضمنا.. ويكون هدفنا وحلمنا.. وبسم الله نبدأ وننسي الخلافات والخناقات اللي صفت دمنا.. وخلتنا نمد ايدينا للي ما يسوي.. واللي ما يعرف ربنا.
وفي عيدنا الكبير.. نقول من قلبنا.. شمر دراعك يا مصري.. وافتكر امجاد اجدادك اللي علموا العالم فنون العلم والدين والسياسة والفلك.. وان المسلمين في يوم المسلمين ان اجلا او عاجلا جايين.. بس عليهم يتمسكوا بصحيح الدين ودعوتهم تكون مستجابة فوق جبل عرفات.. واحنا نلبي معاهم وندعي ونقول بعلو الصوت آمين.. آمين.. آمين.. آمين يارب العالمين.