عروستي!

أعزائي المشاهدين.. معانا النهاردة.. اثنين واحد حكومة والثاني لامؤاخذة عضو من »أبو قبة«، وقبل الحلقة.. فهموني انهم، وبمناسبة »الاجازة الصيفية« قرروا يلاعبوا »الشعب« والمواطنين كام لعبة كده..
ها... قول يا أستاذ.. حتلاعبوا »الشعب« ازاي؟.. هي.. هي.. هي بص يا أبلة.. أول لعبة.. حنلاعبهم »صلح«.. حنوقف »المواطن« من دول وشه في الحيطة ومتغمي، وحيقف وراه 444 عضوا من أبو قبة.. وكل واحد من ال444 يرزعه علي قفاه، ويسأله وهو رافع صباعه.. مين فينا يا »مفتح« اللي سرق فلوس العلاج علي نفقة الدولة.. ها.. ها.. ها، وطبعا المواطن »حيغلب حماره« وقفاه حيتهري.. فنقوم مسهلين عليه وملاعبينه،، »عروستي«، ودي بقي حنقعد فيها المواطن فشر »المقطف« أو »القفة« ونسأله.. فيه 7 نواب سرقوا فلوس العلاج.. منهم واحد قصير ولابس جزمة، والتاني أبيض ومش حالق دقنه، والتالت رجله بتوجعه، والرابع عنده بواسير.. أما الخامس ففيه علامة مميزة محدش يعرفها إلا اللي يقلعه.. تقدر تقول لنا اساميهم ايه.. ولعلمك احنا (المجلس والحكومة) عارفينهم بالواحد كويس. فكر يامواطن وما تعكش، مش عاوزين نظلم حد، وطبعا.. المواطن مش حيعرف.. فنروح داخلين عليه باللعبة التالتة.. ودي بقي مش محتاجة انه »يشغل« مخه ولا يفكر.. بالعكس دي لعبة مريحة خالص.. حنمدد »المواطن« علي الأرض الحكومة تمسكه من ايديه والمجلس يمسكه من رجليه، ونقعد »نشقطه لبعض«، الحكومة تقول له.. أنا عارفه أسامي النواب اللي خدوا الفلوس بس ما أقدرش »أفتن« وتروح حادفه المواطن للمجلس.. فيلقفه ويقول له أنا برضه عارف »أساميهم« بس لازم استني »الأسامي« تكتب في ورق »رسمي« ونقعد »نشقطه لبعض« لغاية المواطن ما يدوخ.. وينسي، وبعدما يدوخ المواطن معانا.. نروح ملعبينه اللعبة الأخيرة، »اليويو«.. للي مش عارفها.. هي الكورة أم استك اللي ترميها ترجع لك تاني. وفيها المواطن حيكتشف أننا بعدما قلنا له.. ان فلوس العلاج »لهفها« أعضاء من المجلس قررنا نرجعها تاني للنواب علشان يلهفوها كمان مرة.. ها.. نكمل لعب.. ولا كفاية.